ވިކްޓްރީ ސްޕޯޓްސް ކްލަބް އަތުން ޕޮއިންޓެއް ލިބުމުން ހިތްހަމަޖެހޭ ކަމަށާއި، ފޯވާޑެއް ނެތްތަން ދައްކާ ކަމަށް އީގަލްސްގެ ކޯޗު އިހުސާން އަބްދުލް ޢަނީ (ސާންތި) ބުނެފި އެވެ.

މާލޭ ލީގުގައި ވިކްޓްރީއާ ވާދަކޮށް 1-1 ގެ ނަތީޖާއިން އީގަލްސް އެއްވަރުވި މެޗަށް ފަހު ނޫސްވެރިންނަށް މައުލޫމާތު ދެމުން ސާންތި ބުނީ ވިކްޓްރީ ކަހަލަ ޓީމެއް އަތުން ޕޮއިންޓެއް ލިބުމުން ހިތްހަމަޖެހޭ ކަމަށާއި، އެންމެ ބޮޑަށް ހިތްހަމަޖެހުނީ ބަލިނުވެ މެޗު ނިންމާލަން ޖެހުން ކަމަށެވެ.

ސާންތި ބުނީ މެޗުގައި އީގަލްސް ދެއްކި ކުޅުމަށް ބަލާއިރު، ތިން ޕޮއިންޓް ހޯދޭނެ ފުރުސަތު ވެސް ޓީމަށް ލިބި ބޭކާރުވި ކަމަށެވެ. އޭނާ ބުނީ ޓީމުގައި މިހާރު ދިމާވާ އެންމެ ބޮޑު ގޮންޖެހުމަކީ ރަނގަޅު ފޯވާޑެއް ނެތުން ކަމަށާއި، އެހެން ހުރިހާ ކަމެއް ޓީމުން ބަރާބަރަށް ކުރާ ކަމަށެވެ.

ސާންތި ބުނީ އީގަލްސް ޓީމުގައި ތިބި ޒުވާން ކުޅުންތެރިން ޕެނަލްޓީ އޭރިޔާ ތެރެއަށް ވަންނަން ވެސް ޖެހުލުންވާ ކަމަށާއި، އެގޮތުން ލަނޑު ޖަހާނެ ކުޅުންތެރިޔާ ފެންނަ ހިސާބުން ޓީމު ރަނގަޅު ކުރެވޭނެ ކަމަށެވެ.

ލީގުގެ ޝެޑިއުލްއާ މެދު ހިތްހަމަނުޖެހުން ފާޅުކޮށް ސާންތި ބުނީ ފުރަތަމަ ބުރުގައި އީގަލްސް ހަވީރު ފަސް މެޗު ކުޅެން ޖެހޭ ކަމަށާއި، ދުވާލަކު އެއްފަހަރު ޝެޑިއުލް ބަދަލުވާ ކަމަށެވެ. އެގޮތުން އަމަލުކުރަންވީ ކޮން ޝެޑިއުލްއަކަށް ކަމެއް ވެސް އޭނާ އަށް ނޭނގޭ ކަމަށެވެ. އެހެން ނަމަވެސް ސާންތި ބުނީ ހޫނު ދުވަހަކަށްވެފައި ކުޅުންތެރިން މެޗުގައި ދެއްކި ކުޅުމާމެދު އޭނާ ހިތްހަމަޖެހޭ ކަމަށެވެ.