ރާއްޖޭގައި ކަންކަން ހިނގަމުން އައިގޮތް ބަދަލުކުރުމަށް ދިވެހިންގެ ބަޔަކު މަަސައްކަތް ކުރާކަމަށާއި ގޮތް ބަދަލު ނުކޮށް ގޮތުގައި ތިބުމަށް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު އެހެން ވިދާޅުވީ، ހޮނިހިރު ދުވަހުގެރޭ ޢިޔާސުއްދީން އިންޓަނޭޝަނަލް ސްކޫލްގައި އޮތް ސްޓޫޑެންޓް އެޗީވްމެންޓް ހަފްލާގައި ވާހަކަ ދައްކަވަމުންނެވެ. އެ ރަސްމިއްޔާތުގައި ވާހަކަ ދައްކަވަމުން ރައީސް ނަޝީދު ވިދާޅުވީ، ގައުމެއް ބިނާކުރެވެނީ ގައުމީޔަތެއް ބިނާކޮށްގެން ކަމަށާއި، ގައުމެއް ބިނާކުރެވޭނީ މާޒީޔަތެއް ހޯދުމުން ކަމަށެވެ. މާޒީގައި ހިނގާފައިވާ ކަންތައްތައް ބަލައި ހޯދަން ޖެހޭ ކަަމަށް ވިދާޅުވިއެވެ. އަދި ހަމައެއާއި އެކު މުސްތަގުބަލުގެ ތަސައްވަރެއް ގެންގުޅުމުން މުހިއްމު ކަމުގެ މައްޗަށް އެމަނިކުފާނު އަލިއަޅުވައިލެއްވިއެވެ.
ދަރިވަރުންނާ މުހާތަބުކޮށް އެމަނިކުފާނު ވިދާޅުވީ، ގައުމީއްޔަތެއްގެ އެންމެ މުހިއްމު ކަމަކީ ކުރީގައި ވެފައި އޮތް ގޮތާއި ދެން ދާން ބޭނުންވާ ތަނަކީ ކޮބައިކަން ސާފުވެފައި އޮތުން ކަމަށެވެ.
ގައުމީއްޔަތު ބަދަލުކޮށް ފޮހެލަން ވެގެން ވަރަށް ބޮޑު މަސައްކަތެއް ވޭތުވެދިޔަ 30 އަހަރުގެ ތެރޭގައި ކޮށްފައިވާ ކަމަށާއި، އެންމެ ބޮޑަށް ކޮށްފައިވާ ކަމަކީ މިސްކިތްތަކާއި، ގަބުރުސްތާނު ތަކާއި، ޒިޔާރަތްތައް ތަޅާލައި މާޒިތައް ފޮހެން ކުރި މަސައްކަތް ކަމަށާއި ކުރިން އަމަލު ނުކުރަމުން އައި ގޮތަކީ ރަނގަޅު ގޮތް ކަމަށް ތައާރަފްވެގެން ދިޔަ ކަމަށް ނަޝީދު ވިދާޅުވިއެވެ. އެގޮތުން ކުރިން ހެދުން އަޅަމުން އައި ގޮތާއި ނަމާދުކުރަން އައި ގޮތްތައް ބަދަލުވެ މި ފަހަކަށް އައިސް ދިރިއުޅުން ބަދަލުކުރަން އެހެން ރޫހެއް އުފެދިފައިވާ ކަމަށް ވެސް ވިދާޅުވިއެވެ.
