އަންނަ އަހަރު ރިޔާސީ އިންތިހާބު އޮންނާނެ ކަމަށް ރައްޔިތުންގެ މަޖިލީހުގެ ކުރީގެ މެމްބަރު އަބްދުއް ލަތީފް މުހައްމަދު ވިދާޅުވެއްޖެއެވެ.
އިދިކޮޅު ޕްރޮގްރެސިވް ކޯލިޝަނުން ބުރާސްފަތި ދުވަހުގެ ރޭ "ދަވާލައިފި" ނަމުގައި ކާނިވާ ސަރަހައްދުގައި ބޭއްވި އެއްވުމުގައި ވާހަކަފުޅު ދައްކަވަމުން މެމްބަރު ލަތީފް ވިދާޅުވީ މި ސަރުކާރު ވަރަށް ބޮޑަށް ފެއިލް ވެފައި ވާކަމަށާއި ރައީސް އިބްރާހީމް މުހައްމަދު ސޯލިހަކީ ބޭވަފާތެރިއެއްކަމަށެވެ.
ލަތީފް ވިދާޅުވީ ރައީސް ސޯލިހް ލަނޑުދެއްވީ ހަމައެކަނި އެބޭފުޅުންނަށް ނޫން ކަމަށާއި ހުރިހާ ރައްޔިތުންނަށް ވެސް ލަނޑުދެއްވިކަމަށެވެ. މީގެ އިތުރުން ލަތީފް ވިދާޅުވީ މި ސަރުކާރުން އެއްވެސް މަސައްކަތެއް ނުކުރާކަމަށާއި މި ސަރުކާރު ވަރަށް އަވަހަށް ބަދަލުވާނެކަމަށެވެ.
މި ޖަލްސާގައި ލަތީފް ވަނީ ރައްޔިތުން ވޯޓުލާން ތައްޔާރަށް ތިބިތޯ ސުވާލު ކޮށްފައެވެ. އެގޮތުން ލަތީފް ވިދާޅުވީ ހަމަޔަގީނުންވެސް އަންނަ އަހަރު އިންތިހާބު އޮންނާނެ ކަމަށް ވިދާޅުވެފައެވެ.
ރައީސް ސޯލިހު ވެރިކަމަށް ގެނައުމަށް މަސައްކަތްކުރި ކުރީގެ މެމްބަރު ލަތީފް ވަނީ ރައީސް ސޯލިހަށް ވަރަށް ބޮޑަށް ފާޑުވިދާޅުވެފައެވެ. އަދި ލަތީފް ވަނީ މި ޖަލްސާގައި ރައީސް ޔާމިނަށް ވަރަށް ބޮޑަށް ތައުރީފް ކުރައްވާފައެވެ.
ލަތީފް ވިދާޅުވީ ރައީސް ޔާމީންގެ ވެރިކަމުގެ ފަސް އަހަރަކީ އެންމެ ބޮޑު ކުރިއެރުމެއް ރާއްޖެއަށް ލިބުނު ފަސް އަހަރު ކަމަށެވެ.
ނަމަވެސް މެމްބަރު ލަތީފަކީ ރައީސް ޔާމީނުގެ ވެރިކަމަށް ވަރަށް ބޮޑަށް ފާޑު ކިޔުއްވި ބޭފުޅެއް ވެސް ވެއެވެ. އަދި ލަތީފް ވަނީ ރައީސް ސޯލިހުއަށް ވެރިކަން ހޯއްދަވައިދެއްވުމަށް ކުރެއްވި ބައެއް ކެމްޕެއިން ދަތުރުތަކުގައި އަދި ބައެއް ޖަލްސާތަކުގައި ވެސް ރައީސް ޔާމީންއަށް ފާޑުވިދާޅުވެ ވަރަށް ގިނަ ވާހަކަތަކެއް ދައްކަވާފައެވެ.
އަބްދުލް ލަތީފް މުހައްމަދު (ފުނަމާ ލަތީފް) 18 ވަނަ ރައްޔިތުންގެ މަޖިލިހުގެ ދިއްދޫ ދާއިރާއަށް ހޮވިވަޑައިގެންނެވީ އަމިއްލަ މެމްބަރެއްގެ ހައިސިއްޔަތުންނެވެ. ލަތީފް ފަހުން ގުޅިވަޑައިގަތީ ޕީޕީއެމްއާ އެވެ. ނަމަވެސް ރައީސް އަބްދުﷲ ޔާމީން، ރައްޔިތުންގެ މަޖިލީސް ކޮންޓްރޯލް ކުރައްވާ ކަމުގެ ތުހުމަތާ އެކު ލަތީފް ވަނީ އޭރުގެ އިދިކޮޅު ފަރާތްތަކާއި އެކު މަސައްކަތް ކުރައްވާފައެވެ.
19 ވަނަ ރައްޔިތުންގެ މަޖިލީހުގެ އިންތިހާބުގައި ވެސް ދިއްދޫ ދާއިރާއަށް ލަތީފް ވާދަކުރެއްވީ މިނިވަން ކެނޑިޑޭޓެއްގެ ގޮތުގައެވެ. މަޖިލިސް އިންތިހާބުގައި ބޮޑު ނާކާމިޔާބީއަކާ ކުރިމަތިލާން ޖެހުނެ ލަތީފްއަށް ކާމިޔާބު ކުރެވުނީ ޖުމްލަ ވޯޓުގެ އެންމެ 6.13 އިންސައްތައެވެ. އެ ދާއިރާގެ ގޮނޑި ކާމިޔާބު ކުރެއްވީ އެމްޑީޕީގެ ޓިކެޓުގައި ވާދަކުރެއްވި އަބްދުﷲ ވަހީދެވެ.
