ޖަޕާނުގައި އޮންނަ ވޯލްޑް ސަރފިންގ ގޭމްސްގައި ވާދަކުރާ ރާއްޖޭގެ ރާޅާ އެޅުންތެރިންނާއި މިނިސްޓަރ އަހްމަދު މަހްލޫފް ބައްދަލު ކުރައްވައިފިއެވެ.
ޔޫތް މިނިސްޓްރީގައި ބޭއްވުނު އެ ބައްދަލުވުމުގައި މިނިސްޓަރ މަހްލޫފް ވަނީ ޖަޕާނުގައި އޮންނަ މުބާރާތުގައި ވާދަކުރާ ރާޅާ އެޅުންތެރިންނަށް ހިތްވަރު ދެއްވައިފައެވެ.
ހޮނިހިރު ދުވަހު ބޭއްވީ އެ ބައްދަލުވުމުގައި މިނިސްޓަރ މަހްލޫފް ވަނީ ރާޅުގަނޑު ސާފު ކުރުމުގެ ޕްރޮގްރާމެއް ބޭއްވުމަށް މަޝްވަރާ ކުރައްވައިފައެވެ. މީގެ އިތުރުން ރާއްޖޭގައި އިންޓަރނޭޝަނަލް ސަރފިންގ މުބާރާތެއް ބޭއްވުމަށް ރާޅާ އެޅުންތެރިންނާ އެކު މިނިސްޓަރ ވަނީ މަޝްވަރާ ކުރައްވައިފައެވެ.
ޖަޕާނުގައި ކުރިއްޔަށްދާ ވޯލްޑް ސަރފިންގ ގޭމްސް އަކީ ދުނިޔޭގެ 55 ގައުމަކުން 250 ސަރފަރުން ވާދަކުރާ މުބާރާތެކެވެ. މި މުބާރާތައް ރާއްޖޭގެ ތިން ރާޅާ އެޅުންތެރިން ބައިވެރިވާނެއެވެ.
މި މުބާރާތުގައި ވާދަކުރާ ރާއްޖޭގެ ރާޅާ އެޅުންތެރިންނަކީ:-
1. ހުސެއިން އަރީފް (ޓީމް ކެޕްޓަން)
2. އިސްމާއީލް ރަޝީދު
3. އަހްމަދު އާގިލް
މި މުބާރާތް ކުރިއަށްދާނީ ސެޕްޓެމްބަރ ހަތަކުން 14 އަށެވެ.
މި މުބާރާތަކީ ދުނިޔޭގެ މިވަގުތު ތިބި އެންމެ މޮޅު ރާޅާ އެޅުންތެރިން ވާދަކުރާ މުބާރާތެކެވެ. އެގޮތުން މި މުބާރާތުގައި، ދުނިޔޭގެ ޗެމްޕިއަންކަން 11 ފަހަރު ހޯދައިފައިވާ އެމެރިކާގެ ކެލީ ސްލޭޓަރ އަދި ދުނިޔޭގެ ޗެމްޕިއަންކަން ދެ ފަހަރު ހޯދައިފައިވާ ބްރެޒިލްގެ ގެބްރިއެލް މެޑީނާ ވާދަކުރާނެއެވެ.
