ލޯން އެއްބަސްވުމެއްގެ ދަށުން މެންޗެސްޓަރ ޔުނައިޓެޑަށް ކުޅެމުން އައި އިނގިރޭސި ޑިފެންޑަރ ކްރިސް ސްމޯލިން ރޯމާއަށް ބަދަލުވެއްޖެއެވެ.

ސްމޯލިން ރޯމާއަށް ބަދަލުވެފައިވަނީ ތިން މިލިއަން ޔޫރޯގެ އަގަކަށް އެއް އަހަރުގެ ލޯން އެއްބަސްވުމެއްގެ ދަށުންނެވެ.

އުމުރުން 29 އަހަރުގެ ސްމޯލިން ރޯމާއަށް ބަދަލުވުމަށް ފަހު ބުނީ، މިއީ އޭނާއަށް އާ ލީގެއް ތަޖުރިބާ ކޮށްލަން ލިބުނު ރަނގަޅު ފުރުސަތެއް ކަމަށާއި، މި ފުރުސަތުގެ ބޭނުން ރަނގަޅު ގޮތުގައި ހިފާނެ ކަމަށެވެ.

މި ސީޒަނަށް އަމާޒުކޮށް ލެސްޓާ ސިޓީގެ ޑިފެންޑަރ ހެރީ މެގުއާ ޔުނައިޓެޑަށް ގެނައުމާއެކު، ސްމޯލިންއަށް ފުރަތަމަ އެގާރައިން ޖާގަ ލިބުން ދަތިވިއެވެ. އަދި އޭނާ ރޯމާއަށް ބަދަލުވިއިރު، މި ސީޒަނުގައި ޔުނައިޓެޑަށް މެޗެއް ވެސް ކުޅެފައެއް ނުވެއެވެ.

ޔުނައިޓެޑާއެކު ސްމޯލިން ހަދާފައިވާ އެއްބަސްވުން 2022 ވަނަ އަހަރު ހަމަވާއިރު، ރޯމާގެ އިތުރުން އެހެން ކްލަބްތަކުންވެސް އޭނާ ހޯދުމަށް މަސައްކަތް ކުރިއެވެ.

ފުލަމް އިން 2008 ވަނަ އަހަރު ކެރިޔަރު ފެށި ސްމޯލިން ޔުނައިޓެޑަށް ބަދަލުވީ 2010 ގައެވެ. އޭނާ ވަނީ މިހާތަނަށް އެޓީމަށް ކުޅުނު 323 މެޗުގައި 18 ލަނޑު ކާމިޔާބު ކޮށްފައެވެ.

ސްމޯލިން ވަނީ ޔުނައިޓެޑާ އެކު ދެ ޕްރިމިއާ ލީގު، ތިން ޔުއެފާ ކޮމިއުނިޓީ ޝިލްޑް، އެފްއޭ ކަޕް، ލީގު ކަޕް އަދި ޔޫރޮޕާ ލީގު ކާމިޔާބު ކޮށްފައެވެ.

އިންގްލޭންޑްގެ ޒުވާން ޓީމުތަކަށް ކުޅެފައިވާ ސްމޯލިން ވަނީ އިންގްލޭންޑްގެ ސީނިއާ ޓީމަށް 31 މެޗު ކުޅެފައެވެ.