ހައްޖު ރޯގާގެ ސަބަބުން ހޯމް މިނިސްޓަރ އިމްރާން އަބްދުﷲ އަށް މަޖިލިސް ހާޒިރުވެވަޑައިގެންނެވެން ނެތްކަމަށް އަންގަވާފައިވާކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.

ހޯމް މިނިސްޓަރ މަޖިލީހަށް ހާޒިރުކޮށް ސުވާލުކުރުމަށް ހުށަހަޅާފައިވަނީ ކާށިދޫ ދާއިރާގެ މެމްބަރު އަބްދުﷲ ޖާބިރުއެވެ. މެމްބަރު ޖާބިރު މިނިސްޓަރާއި ސުވާލުކުރެއްވުމަށް ހުށަހަޅުއްވާފައިވަނީ 7 ފެބްރުއަރީގައި ފުލުހުންގެ އިދާރާގައި ހިނގައިދިޔަ ކަންތައް އަލުން ތަކުރާރުވިޔަ ނުދިނުމަށް އަޅާފައިވާ ފިޔަވަޅު ތަކަކީ ކޮބައިތޯ އާއި ގުޅިގެން ސުވާލު ކުރުމަށެވެ.

ހޯމަ ދުވަހު ޖަލްސާއަށް މިނިސްޓަރ އެކަމާއި ގުޅޭގޮތުން ހާޒިރުކޮށް ސުވާލުކުރުމަށް ވަނީ އެޖެންޑާކޮށްފައެވެ. ނަމަވެސް މަޖިލީސް ޖަލްސާ ފައްޓަވައިދެއްވަމުން ރައީސް ނަޝީދު ވިދާޅުވީ މިނިސްޓަރ ވަނީ ހައްޖު ރޯގާގެ ސަބަބުން ހޯމަ ދުވަހުގެ މަޖިލީހުގެ ޖަލްސާއަށް ހާޒިރުވާން އުޒުރުވެވަޑައިގަންނަވާ ކަމަށް ވިދާޅުވެ މަޖިލީހަށް ސިޓީ އެއް ފޮނުއްވާފައިކަމަށެވެ. މަޖިލީހުގެ ރައީސް، ރައީސް މުހައްމަދު ނަޝީދު ވަނީ އެ ސިޓީ މަޖިލީހަށް އިއްވާފައެވެ. މަޖިލީހުގެ ރައީސް ވިދާޅުވީ، އެހެންކަމުން އެ މައްސަލަ ފަހުގެ ތާރީޚެއްގެ ޖަލްސާއަކަށް އަނެއްކާވެސް އެޖެންޑާކުރައްވާނެ ކަމަށެވެ.

މިނިސްޓަރ އިމްރާން ވަނީ މި އަހަރުގެ ހައްޖުގެ އަޅުކަމުގެ ބައިވެރިވެ ވަޑައިގަތުމަށްފަހު، އެނބުރި މާލެ ވަޑައިގެންފައެވެ.