އާސެނަލް ދޫކޮށް ޖަރުމަންގެ ޑިފެންޑަރ މުސްތާފީ ރޯމާއަށް ބަދަލުވާން އުޅޭ ކަމަށް ރިޕޯޓްތައް ބުނެފިއެވެ.
ޑެއިލީ މެއިލްއިން ބުނީ، އުމުރުން 27 އަހަރުގެ މުސްތާފީ ރޯމާއަށް ބަދަލުވާން އުޅެނީ ލޯން އެއްބަސްވުމެއްގެ ދަށުން ކަމަށެވެ. އަދި މިހާރު ކުރިޔަށްދަނީ ޓްރާންސްފާގެ ފަހުގެ ކަންތައްތައް ކަމަށެވެ.
އެ ނޫހުން ބުނީ، މުސްތާފީ ލޯން އެއްބަސްވުމެއްގެ ދަށުން ރޯމާއަށް ބަދަލުވި ނަމަވެސް، އޭނާގެ އެއްބަސްވުން 23 މިލިއަން ޕައުންޑަށް ދާއިމީ ކުރުމުގެ އިހްތިޔާރު ރޯމާއަށް އޮންނާނެ ކަމަށެވެ.
ގިނަ ކްލަބްތަކުން ފާރަލަމުން އަންނަ މުސްތާފީ ހޯދުމަށް އިޓަލީގެ އިތުރުން ޗައިނާ އާއި ޖަރުމަންގެ ކްލަބްތަކުން މަސައްކަތް ކުރަމުން އަންނަ ކަމަށެވެ.
އެވަޓަންއިން 2009 ވަނަ އަހަރުގެ ސީޒަނުގައި ކެރިޔަރު ފެށި މުސްތާފީ ވަނީ ސަމްޕްޑޯރިއާ އަދި ވެލެންސިއާއަށްވެސް ކުޅެފައެވެ.
މުސްތާފީ ވަނީ އާސެނަލްއަށް 2016 ވަނަ އަހަރުގެ ސީޒަނުގައި ބަދަލުވެ، އެ ކްލަބަށް މިހާތަނަށް ކުޅުނު 112 މެޗުގައި 8 ލަނޑު ކާމިޔާބުކުރުމުގެ އިތުރުން، އެ ކްލަބާއެކު އެފްއޭ ކަޕް ކާމިޔާބުކޮށްފައެވެ.
ޖަރުމަން ގައުމީ ޓީމާއެކު 2014 ވަނަ އަހަރު ފީފާ ވޯލްޑް ކަޕް ކާމިޔާބުކޮށްފައިވާ މުސްތާފީ ވަނީ 2017 ވަނަ އަހަރު އޮތް ފީފާ ކޮންފެޑެރޭޝަންސް ކަޕްވެސް އެ ގައުމާއެކު ކާމިޔާބުކޮށްފައެވެ.
ޖަރުމަން ގައުމީ ޓިމަށް ކުޅުނު 20 މެޗުގައި ދެ ލަނޑު ކާމިޔާބުކޮށްފައިވާ މުސްތާފީ ވަނީ ޖަރުމަންގެ 17 އަހަރުން ދަށުގެ ޓީމާއެކު 2009 ވަނަ އަހަރު ޔޫރޯ ކާމިޔާބުކޮށްފައެވެ.
