މިރެއިން ފެށިގެން ކުރިއަށް އޮތް ތިން ދުވަހުގެ ދުވާލު އަދި ރޭގަނޑު ދަންފަޅީގައިވެސް، މަޖިލީހުގެ ޖަލްސާތައް ބާއްވަން ނިންމައިފިއެވެ.

ރޭގަނޑު ބާއްވަން ހަމަޖެހިފައިވާ ޖަލްސާތައް ބާއްވަން ނިންމާފައިވަނީ ރޭގަނޑު 9 ޖަހާއިރުއެވެ.

ހޯމަ ދުވަހުގެ ޖަލްސާގައި ވާހަކަފުޅުދައްކަވަމުން މަޖިލީހުގެ ރައީސް މުހައްމަދު ނަޝީދު ވިދާޅުވީ މިރެ އާއި ކުރިއަށް އޮތް ތިން ރޭވެސް މަޖިލީހުގެ ޖަލްސާއެއް ބާއްވަން ނިންމާފައިވާ ކަމަށެވެ. ނަމަވެސް މި ގޮތަށް ޖަލްސާތައް ބާއްވަން ނިންމާފައިވަނީ އެޖެންޑާގައި ހުރި މަސައްކަތް ނިމެންދެނެވެ. ތިން ދުވަހުގެ ކުރިން އެޖެންޑާގައިވާ މަސައްކަތް ނިމިއްޖެކަމުގައި ވާނަމަ، ރޭގަނޑު ޖަލްސާ ނުބާއްވާނެއެވެ.

މަޖިލީހުގެ ޖަލްސާތައް ރޭގަނޑާއި ދުވާލު ބާއްވަން ނިންމާފައިވަނީ އީދު ބަންދަށް މަޖިލިސް ބަންދުވާނެތީވެ،އޭގެ ކުރިން އެޖެންޑާގައި ހުރި މަސައްކަތް ތޮއްޖެހުން ކުޑަކުރުމުގެ ގޮތުން ކަމަށް މަޖިލީހުގެ ރައީސް ވަނީ ވިދާޅުވެފައެވެ. ރައީސް ނަޝީދު ވިދާޅުވީ މަޖިލީހުގެ އެޖެންޑާގައި ނުނިމިހުރި ގިނަ މަސައްކަތްތައް އަދިވެސް އެބަހުރި ކަމަށެވެ.

މަޖިލީހުގެ ޖަލްސާތައް އޮންނަނީ ކޮންމެ ހަފްތާއެއްގެ ހޯމަ، އަންގާރަ، ބުދަ ދުވަހުގެ ހެދުނު 9 ޖަހާއިރުއެވެ.