މިދިޔަ ސީޒަނުގައި ނެދަލޭންޑްސްގެ އަޔަކްސް އެމްސަޓަރޑެމްއިން ވިދާލި ޒުވާން މިޑްފީލްޑަރު ޑޮނީ ވެން ޑެބީކް ހޯދުމަށް ސްޕެއިންގެ ގަދަ ބާރު ރެއާލް މެޑްރިޑްއިން މަސައްކަތް ފަށައިފިއެވެ.
ޕައުލް ޕޮގްބާގެ ސޮއި ހޯދަން ކުރި މަސައްކަތް ނާކާމިޔާބުވުމާ ގުޅިގެން ރެއާލްއިން ވަނީ އުމުރުން 22 އަހަރުގެ ވެން ޑެބީކް ހޯދުމުގެ މަސައްކަތް ފަށާފައެވެ. އެގޮތުން އޭނާ ހޯދުމަށް އެޓީމުން 60 މިލިއަން ޔޫރޯ ކުރިޔަށް އޮތް ދުވަސްތަކުގައި ހުށަހަޅާނެ ކަމަށް ބެލެވެއެވެ.
ނޫސްވެރިންނާއި ވާހަކަ ދައްކަމުން ވެން ޑެބީކް ވަނީ ރެއާލްއިން އޭނާ ހޯދުމަށް މަސައްކަތް ކުރަމުންދާ ކަމަށް ބުނެފައެވެ. އެގޮތުން އޭނާ ބުނީ ރެއާލްއިން މަޝްވަރާތައް ފަށާފައިވާ ކަމަށާއި އެކަމާ ގުޅޭގޮތުން އިތުރަށް ވާހަކަ ދައްކަން ބޭނުންނުވާ ކަމަށެވެ. ރެއާލްއަކީ ކުޅެން ވަރަށް ރަނގަޅު ކްލަބެއް ކަމަށާއި އޭނާގެ އޭޖެންޓް ޓްރާންސްފާގެ ކަންކަން ކުރިޔަށް ގެންދާނެ ކަމަށް ވެން ޑެބީކް ބުންޏެވެ.
އޭނާ ބުނީ ނޫސްތަކުގައި ރިޕޯޓްކުރާ ކޮންމެ ވާހަކައަކީ ތެދެއް ކަމަށް ދެކިގެން ނުވާ ކަމަށާއި އޭނާގެ ފޯކަސް ހުރީ އަޔަކްސް އިން މި ސީޒަނުގައި ކުޅެން ޖެހޭ މެޗުތަކަށް ކަމަށެވެ.
އަޔަކްސްގެ ޓީމުގެ އެންމެ މުހިންމު ދައުރެއް އަދާކުރި ދެ ކުޅުންތެރިން ޓީމު ދޫކޮށް އެހެން ޓީމުތަކަށް ބަދަލުވެފައިވާއިރު އެޓީމު އެންމެ ފަހުން ކުޅުނު މެޗުގައި ބައެއް ސަޕޯޓަރުން ވަނީ ވެން ޑެބީކް ޓީމުގައި މަޑުކުރުމަށް އެދި ސަޕޯޓްކޮށްފައެވެ.
ނެދަލޭންޑްސްގެ ލީގު އަދި ކަޕް ކާމިޔާބުކޮށް ޒުވާން ޓީމަކާއެކު ޔުއެފާ ޗެމްޕިއަންސް ލީގުގެ ސެމީ ފައިނަލުން އަޔަކްސް ޖާގަ ހޯދިއިރު އެޓީމުގައި ތަފާތު މޮޅު ކުޅުމެއް ވެންޑެބީކް ދެއްކިއެވެ. އޭނާ ވަނީ މިދިޔަ ސީޒަނުގައި އެޓީމަށް 57 މެޗު ކުޅެ 17 ލަނޑު ޖަހައިދީފައެވެ.
