ދިރާގު ދިވެހި ޕްރިމިއާ ލީގުގައި އަލީ އަޝްފާގު (ދަގަނޑޭ) ގެ ހެޓްރިކާއެކު ކްލަބް ގްރީން ސްޓްރީޓްސްއިން ފަސޭހަ މޮޅެއް ހޯދައިފިއެވެ.

ހޮނިހިރު ދުވަހު ހަވީރު ކުޅުނު މެޗުން ގްރީން މޮޅުވީ ފ.ނިލަންދޫއާ ވާދަކޮށް 0-6 ގެ ތަފާތުބޮޑު ނަތީޖާއަކުންނެވެ.

މެޗު ފެށިގެން ހަވަނަ މިނެޓުގައި ގްރީންއިން ވަނީ ލީޑު ނަގައިފައެވެ. މި ލަނޑު ކާމިޔާބުކުރީ ދަގަނޑޭއެވެ. މި ލަނޑަށްފަހު ވެސް ގްރީންއަށް ވަނީ ލަނޑު ޖެހުމަށް ގިނަ ފުރުސަތުތަކެއް ލިބި ބޭކާރުވެފައެވެ.

ފުރަތަމަ ހާފް ނިމުމުގެ ކުރިން ގްރީންއިން ވަނީ ލީޑު ފުޅާކޮށްފައެވެ. މި ލަނޑު 31 ވަނަ މިނެޓުގައި އެޓީމަށް ކާމިޔާބު ކޮށްދިނީ އިބްރާހިމް ރިޒުހާންއެވެ.

ދެވަނަ ހާފް ފެށިގެން ތިންވަނަ މިނެޓުގައި މުހައްމަދު އުމެއިރު ވަނީ ގްރީންގެ ތިންވަނަ ލަނޑު ކާމިޔާބު ކޮށްފައެވެ. ގްރީންގެ ހަތަރުވަނަ ލަނޑު 64 ވަނަ މިނެޓުގައި ދަގަނޑޭ ކާމިޔާބުކުރިއިރު، 73 ވަނަ މިނެޓުގައި ދަގަނޑޭ ވަނީ އިތުރު ލަނޑެއް ކާމިޔާބުކޮށް ހެޓްރިކް ފުރިހަމަކޮށްފައެވެ.

މެޗުގައި ގްރީންގެ ހަވަނަ ލަނޑު 82 ވަނަ މިނެޓުގައި ކާމިޔާބުކުރީ އަބްދުﷲ ޔާމީންއެވެ. މެޗުގެ މޮޅު ކުޅުންތެރިޔަކަށް ހޮވުނީ ހެޓްރިކް ހެދި ދަގަނޑޭއެވެ.

މި ނަތީޖާއާއެކު ގްރީން އޮތީ ކުޅުނު ފަސް މެޗުން ލިބުނު 8 ޕޮއިންޓާއެކު ޕޮއިންޓް ތާވަލުގެ ތިންވަނައިގައެވެ. މެޗުން ބަލިވި ނިލަންދޫ އޮތީ ކުޅުނު ފަސް މެޗުންވެސް ބަލިވެ ތާވަލުގެ ފުލުގައެވެ.