ގައުމު ފެހިކުރުމުގެ ގޮތުން ހިންގި ހަރަކާތެއްގައި ބާރަ ގަޑިއިރު ތެރޭ އިތިއޯޕިއާގައި 350 މިލިއަން ގަސް އިންދައިފިއެވެ.
އިތިއޯޕިއާގެ ބޮޑުވަޒީރު އަބީ އަހުމަދުގެ އިސްނެންގެވުމަކަށް ފެށި "ގްރީން ލެގަސީ" ކެމްޕެއިން ހަރަކާތް ހިންގާފައިވަނީ ހޯމަ ދުވަހުގައެވެ. މިހަރަކާތުގައި އިތިއޯޕިއާގެ އެކި ހިސާބުތަކުން މިލިއަނަކަށް ވުރެ ގިނަ ރައްޔިތުން ބައިވެރިވެފައިވާއިރު، ފުރަތަމަ ހަ ގަޑިއިރުގެ ތެރޭގައި ވެސް 150 މިލިއަން ގަސް އިންދާފައިވާ ބޮޑުވަޒީރު އަބީ ޓްވީޓް ކުރެއްވިއެވެ.
ހަރަކާތް ކާމިޔާބުކަމާއި އެކު ނިންމާލެވިއްޖެކަން އިއުލާން ކުރައްވަމުން އަބީ ވިދާޅުވީ ކަނޑައެޅި އަމާޒު ހުރަސްކޮށް، އިތުރު ގިނަ އަދަދެއްގެ ގަސްތަކެއް އިންދާފައިވާ ކަމަށެވެ.
353,633,660 Tree Seedlings Planted in 12 Hours. This is in #Ethiopians
— Dr.-Ing. Getahun Mekuria (@DrGetahun) July 29, 2019
Regional Shares of Trees Planted today.#PMOEthiopia #GreenLegacyEthiopia pic.twitter.com/2BkTDtYedC
މި ހަރަކާތާ ގުޅޭގޮތުން ކުރެއްވި ޓްވީޓެއްގައި އެގައުމުގެ މިނިސްޓަރ ފޯރ އިނޮވޭޝަން އެންޑް ޓެކްނޮލޮޖީ ގެޓަހުން މެކޫރިއާ ވިދާޅުވީ ޖުމްލަ 353،633،660 ގަސް އިންދާފައިވާ ކަމަށެވެ. މިއީ ދުނިޔޭގެ ރެކޯޑެއްކަމަށް ބައެއް ފަރާތްތަކުން ބުނެފައިވެއެވެ. ބާރަ ގަޑިއިރު ތެރޭ އެންމެ ގިނަ ގަސް އިންދުމުގެ ރެކޯޑު އޮންނަނީ އިންޑިއާ އަތުގައެވެ. އެގައުމުން ވަނީ 12 ގަޑިއިރުގެ ތެރޭގައި 66 މިލިއަން ގަސް އިންދާފައެވެ.
އިތިއޯޕިއާއިން ވަނީ މިއަހަރުގެ ވިއްސާރަ މޫސުން ނިމުމުގެ ކުރިން ޖުމްލަ 4 ބިލިއަން ގަސް އިންދުމުގެ ލަނޑުދަނޑިއެއް ކަނޑައަޅާފައެވެ. އިތިއޯޕިއާއިން މިމަސައްކަތް ފަށާފައިވަނީ އެގައުމުން ފާއިތުވެ ދިޔަ ގަރުނުގެ ތެރޭގައި ގިނަ އަދަދެއްގެ ގަސް ކެނޑުމާއި ގުޅިގެން، މޫސުމަށް އަންނަ ނޭދެވޭ ބަދަލުތަކުގެ ސަބަބުން ކުރިމަތިލާން ޖެހިފައިވާ ކަންކަމާއި ގުޅިގެންނެވެ. އެގައުމުގެ އާބާދީގެ 80 އިންސައްތައަކީ ދަނޑުވެރިކަމަށް ބަރޯސާވެގެން އުޅޭ ބަޔެކެވެ.
