އިންޑިއަން އޯޝަން އައިލެންޑް ގޭމްސްގެ ބެޑްމިންޓަން މިކްސް ޑަބަލްސްގެ ސެމީ ފައިނަލުން ބަލިވި ނަމަވެސް އަޖުފާންއާއި މައިސާގެ ޕެއަރއިން ބްރޮންޒް މެޑަލް ޔަގީންކޮށްފިއެވެ.
މިކްސް ޑަބަލްސް ސެމީ ފައިނަލްގައި މުޙައްމަދު އަޖުފާން ރަޝީދުއާއި، މައިސާ ފަތުހުﷲގެ ޕެއަރ ބަލިވީ މޮރީޝަސްގެ އެއްވަނަ ޕެއަރ އަތުން 2 ސެޓު 1 ސެޓުންނެވެ.
މި މެޗުން ބަލިވިކަމުގައިވިޔަސް މި އިވެންޓުން ބްރޮންޒް މެޑަލް މައިސާއާއި އަޖުފާނަށްވަނީ ޔަގީންވެފައެވެ. އިންޑިއަން އޯޝަން އައިލެންޑް ގޭމްސްގެ ބެޑްމިންޓަނުން ރާއްޖެއިންވަނީ މިހާތަނަށް ފަސް މެޑަލް ޔަގީންކޮށްފައެވެ.
ޓީމް އިވެންޓުގައި އަންހެން ޓީމް އަދި ފިރިހެން ޓީމްވެސް ބްރޮންޒް މެޑަލް ހޯދިއިރު މިކްސް ޑަބަލްސްއިންވެސް ބްރޮންޒް ޔަގީންވީއެވެ. ދެން އޮތީ ހުކުރު ދުވަހު ކުޅޭ ދެ ފައިނަލު މެޗުން ލިބޭ މެޑައްޔަކަށް އިންތިޒާރުކުރުމެވެ.
ހުކުރު ދުވަހު އަންހެން ޑަބަލްސް ފައިނަލްގައި ނަބީހާއާއި ނަބާހާގެ ޕެއަރ ވާދަކުރާއިއިރު، ސިންގަލްސް ފައިނަލްގައި ނަބީހާވެސް ވާދަކުރާނެއެވެ. މި ފައިނަލްތަކާއިއެކު މިފަހަރުގެ ގޭމްސްގެ ބެޑްމިންޓަން އިވެންޓްތައް ނިމޭނެއެވެ.
