އިންޑިއަން އޯޝަން އައިލެންޑް ގޭމްސްގެ، ބެޑްމިންޓަންގައި ދިވެހި ފިރިހެނުންގެ ޓީމް ކުޅުނު ދެވަނަ މެޗުންވެސް ބަލިވެއްޖެއެވެ.

މޮރިޝަސްގައި މިހާރު ކުރިއަށްދާ އިންޑިއަން އޯޝަން އައިލެންޑް ގޭމްސްގައި ހޮނިހިރު ދުވަހު ރާއްޖޭގެ ޤައުމީ ބެޑްމިންޓަން ޓީމް ކުޅުނު ދެވަނަ މެޗުން ބަލިވީ މޮރިޝަސްއާ ބައްދަލުކޮށް 4-1 އިންނެވެ.

ޖުމްލަ ފަސް މެޗު ކުޅުނުއިރު ދިވެހި ޓީމަށް ކާމިޔާބުކުރެވުނީ ސިންގަލްސްގައި އަޖްފާން ކުޅުނު މެޗު އެކަންޏެވެ. މިމެޗު އަޖްފާން ކާމިޔާބުކުރީ ފުރަތަމަ ސެޓު ގެއްލިފައިވަނިކޮށް ފަހަތުން އަރައި ޖެހިގެން ކުޅުނު ދެސެޓު ކާމިޔާބުކޮށްގެންނެވެ. އެއީ 14-21، 21-17، 21-18 އިންނެވެ.

ސިންގަލްސްގެ ދެވަނަ މެޗުން ނިބާލް ބަލިވީ 13-21ގެ ސްކޯއަކުން ދެސެޓުވެސް ގެއްލުމުންނެވެ. އަދި ތިން ވަނަ މެޗުގައި ނަޝީއު ބަލިވީވެސް ސީދާ ދެ ސެޓުންނެވެ. އެއީ 12-21، 12-21 އިންނެވެ.

ޑަބަލްސް ދެ މެޗުގެ ތެރެއިން ފުރަތަމަ މެޗުން އަޖްފާން އާއި ޝަމިއުގެ ޕެއަރ ބަލިވީ ދެ ސެޓު އެއް ސެޓުންނެވެ. އެއީ 8-21، 21-17، 13-21 އިންނެވެ. ޑަބަލްސް ދެވަނަ މެޗުގައި ނަޝީއު އާއި ނަޝްފާން އަތުން ފުރަތަމަ ގޭމް ގެއްލުނީ 12-21ނެވެ. އަދި ދެވަނަ ގޭމް ނިމުނީ 9-21 މޮރީޝަސް މެޗު ކާމިޔާބުކޮށްގެންނެވެ.