ސްރީ ލަންކާގައި ވޭތުވެދިޔަ 43 އަހަރުގެ މަރުގެ އަދަބު ތަންފީޒުކުރަން ނިންމާފައިވާއިރު، ދަންޖައްސައިދޭން ދެ މީހަކަށް ދީފިއެވެ.
މަރުގެ އަދަބު ތަންފީޒުކުރުމުގެ ގޮތުން ދަންޖައިސައިދިނުމުގެ ވަޒީފާއަށް މީހުން ނަގާފައި މިވަނީ މަސްތުވާތަކެތީގެ މައްސަލައިގައި ކުށް ސާބިތުވެފައިވާ ހަތަރު ކުށްވެރިއަކަށް މަރުގެ އަދަބު ދޭންޖެހިފައިވާކަމަށް އެ ގައުމުގެ ރައީސް އިއުލާކުރައްވާފައިވަނިކޮށެވެ.
މި ފަހަރު ދަންޖައްސައިގެން އަދަބު ދޭން ފަށައިފިނަމަ 1976 ން ފެށިގެން މަރުގެ އަދަބު ދިނުން ހުއްޓާލާފައި އެ ގައުމުގައި އޮތް އޮތުމަށް ނިމުން އަންނާނެއެވެ.
މަރުގެ އަދަބު ތަންފީޒުކޮށްދިނުމުގެ މަސައްކަތްކުރުމަށް ބޭނުންވެގެން ފެބުރުއަރީ މަހު ކުރި އިއުލާނާ ގުޅިގެން އެ ވަޒީފާއަށް 100 އަށްވުރެ ގިނަ މީހުން ކުރިމަތި ލިއެވެ.
އެ ވަޒީފާއަށް ހޯދާފައިވަނީ އުމުރުން 18 އަހަރާއި 45 އަހަރާ ދެމެދުގެ ބުއްދި ސަލާމަތުން ހުރި އެ ގައުމުގެ ފިރެހެނުންނެވެ.
ދައުލަތުން ހިންގާ ޑެއިލީ ނިއުސްގައި ބުނެފައިވާ ގޮތުން އެމެރިކާގެ ދެ މީހަކާއި ދެ އަންހެނަކުވެސް ވަޒީފާއަށް ކުރިމަތިލިއެވެ.
ޖަލުގެ ތަރުޖަމާނު ވިދާޅުވިގޮތުގައި ވަޒީފާއަށް ހޮވުނު ދެ މީހުން އެމީހުންގެ އެންމެ ފަހުގެ ތަމްރީނުތައް ފުރިހަމަކުރަން ފަށަން ޖެހިފައިވާއިރު އެކަމަށް ދެ ހަފްތާއެއްހާ ދުވަސްނަގާނެކަމަށެވެ.
ދަން ޖެއްސުމުގެ ވަޒީފާގައި އެންމެ ފަހުން ހުރި މީހާ އިސްތިއުފާ ދީފައިވަނީ ދަންޖައްސާތަން ފެނި ޝޮކެއް ޖެހުމާއި ގުޅިގެން މީގެ ފަސް އަހަރު ކުރިންނެވެ.
އޭގެ ފަހުން މިދިޔަ އަހަރު އިތުރު މީހަކު އެ ވަޒީފާއަށް ހޮވި ނަމަވެސް އޭނާ މަސައްކަތަކަށް ނުނިކުމެއެވެ.
