ބޯކޮށް ވާރޭވެހުމުގެ ސަބަބުން އިންޑިއާގެ ހުޅަނގު ސިޓީއެއް ކަމައްވާ ޕޫނޭގައި އިމާރަތް ކުރަމުންދިޔަ ސައިޓެއްގެ ކައިރީގައި ހުރި ފާރު ވެއްޓި 15 މީހުން މަރުވެއްޖެއެވެ.
އިމާރަތްކުރަމުންދިޔަ ސައިޓު ކައިރީގައި ހުރި ފާރު ވެއްޓި ފައިވަނީ އެ ސައިޓްކައިރީގައި ހަދާފައި ހުރި މަސައްކަތުމީހުން ތިބޭ ވަގުތީ ހަޓުތަކެއްގެ މައްޗަށެވެ. ފާރު ވެއްޓުނު ވަގުތު މަސައްކަތް ކުރަމުން ދިޔަ މީހުންގެ އާއިލާ މީހުންތިބީ ނިދާފައި ކަމަށް މައުލޫމާތުލިބެއެވެ. މަރުވި މީހުންގެ ތެރޭގައި 4 ކުޑަކުދިން ވެސް ހިމެނެއެވެ.
ފާރުގެ ދަށުވެފައިތިބި މީހުން ސަލާމަތް ކުރުމުގެ މަސައްކަތް މިހާރު ކުރަމުން އަންނަ ކަމަށާއި އަދި މިހާތަނަށް އައިއިރު ސަލާމަތް ކުރެވުނީ ތިން މީހުން ކަމަށް ފަޔާ ބްރިގޭޑް މައުލޫމާތު ދެއެވެ.
ޕޫނޭ އަށް އަންނަނީ ހުކުރު ދުވަހުގެ ހެނދުނުން ފެށިގެން ބޯކޮށް ވާރޭވެހެމުންނެވެ. ކޮންމެ އަހަރެއްގެ ވެސް ޖޫންމަހުން ފެށިގެން ސެޕްޓެމްބަރު މަހާ ދެމެދަކީ އިންޑިއާއަށް ވާރޭވެހޭ ދުވަސްވަރެވެ.
