"ޖާރނީ ޓު ދަ ސަނީ ސައިޑް" ސިލްސިލާގެ ތިން ވަނަ ރޯޑް ޝޯ އިންޑިއާގައި ފަށައިފިއެވެ
އެމްއެމްޕީއާރްސީގެ ފަރާތުން އިންތިޒާމްކުރާ ޝޯ ބޭއްވުމަށް ހަމަޖެހިފައިވަނީ އިންޑިއާގެ ބެންގަލޫރު، މުމްބާއީ، ކޮލްކަތާ، ނިއު ދިއްލީ އަދި ޗާންދިގަރުގައެވެ.
ޖޫން 24 އިން 28 އަށް ކުރިއަށް ގެންދާ ރޯޑް ޝޯގައި ވަނީ ފަތުރުވެރިކަމުގެ ސިނާއަތުގައި ހަރަކާތްތެރިވާ 25 ކުންފުންޏަކުން ބައިވެރިވެފައެވެ.
އެމްއެމްޕީއާރުސީ އިން ބުނީ މި ރޯޑް ޝޯ އިންތިޒާމް ކުރުމުގެ މަގްސަދަކީ ދިވެހި ރާއްޖެ އިންޑިޔާއަށް ދައްކާލާ، އިޝްތިހާރުކުރުން ކަމަށެވެ.
އެމްއެމްޕީއާރުސީ އިން ބުނީ މި އިވެންޓްގައި ފަތުރުވެރިކަމުގެ ސިނާއަތުގައި މަސައްކަތް ކުރާ ފަރަތްތަކާއި އިންޑިއާގެ އޮޕަރޭޓަރުންނާ ބައްދަލުކޮށް ރާއްޖޭގެ ފަތުރުވެރިކަން ކުރިއެރުވޭނެ ކަމަށެވެ.
މީގެ އިތުރުން މި ރޯޑް ޝޯގެ ބައިވެރިންގެ ފަރާތުން ހާއްސަ އިނާމްތައް ވެސް ކަނޑައަޅާފައިވާ ކަމަށް އެމްއެމްޕީއާރުސީ އިން ބުންޏެވެ. އެ ގޮތުން މި ޝޯގެ ތެރެއިން ޝަންގްރީލާ ވިލިންގިލި ރިސޯޓް އެންޑް ސްޕާގެ ފަރާތުން ކޮންމެ ސިޓީއެއްގައި ގުރުއަތުން ހޮވޭ ދެ ފަރާތަކަށް ރާއްޖޭގައި ޗުއްޓީ ހޭދަ ކޮށްލުމުގެ ފުރުސަތު ލިބިގެންދާނެ ކަމަށް އެމްއެމްޕީއާރުސީ އިން ބުންޏެވެ.
ރާއްޖެ އަންނަ ފަތުރުވެރިންގެ ތަފާސް ހިސާބުތަކަށް ބަލާއިރު، އިންޑިއާ އިން ރާއްޖެއަށް އައި ފަތުރުވެރިންގެ ނިސްބަތް ވަނީ ފާއިތުވި ތިން އަހަރު ވަރަށް ބޮޑަށް އިތުރުވެފައެވެ. 2018 ވަނަ އަހަރު އިންޑިއާ އިން ރާއްޖެއަށް ޒިޔާރަތްކުރި ފަތުރުވެރިންގެ ނިސްބަތް ނުވަ އިންސައްތަ އިތުރުވެފައިވާކަން ތަފާސް ހިސާބުތަކުން ދައްކައެވެ. އަދި 2019 މެއި މަހުގެ ނިޔަލަށް 8.8 އިންސައްތައިގެ ޙިއްސާއަކާ އެކު އިންޑިޔާ އޮތީ ރާއްޖެއަށް ތިން ވަނަ އަށް އެންމެ ގިނަ ފަތުރުވެރީން އަންނަ ޤައުމުގެ ގޮތުގައެވެ. އިންޑިޔާއަކީ ރާއްޖެއަށް ގިނަ ފްލައިޓްތަކެއް އޮޕަރޭޓްކުރާ ގައުމަކަށްވުމާ އެކު، އެމްއެމްޕީއާރްސީ އިން ވަނީ ރާއްޖެ އިޝްތިހާރުކުރުމަށްޓަކައި ގިނަ ހަރަކާތްތަކެއް ރާވާފައެވެ. އެ ގޮތުން ބޭރު ފެއާތަކުގައި ބައިވެރިވުން ފާހަގަކޮށްލެވެއެވެ.