މިސްރުގައި ކުޅެމުންދާ އެފްރިކަން ކަޕް އޮފް ނޭޝަންސްގައި އައިވަރީ ކޯސްޓާއި ދެކުނު އެފްރިކާ ބައްދަލުކުރި މެޗް އައިވަރީ ކޯސްޓުން ކާމިޔާބު ކޮށްފިއެވެ.
މި މެޗް އައިވަރީ ކޯސްޓުން ކާމިޔާބު ކުރީ 1-0 ގެ ނަތީޖާ އަކުންނެވެ.
މެޗުގެ ފުރަތަމަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނުނުއިރު، ގިނަ ވަގުތު ބޯޅަ ހިފަހައްޓައިގެން ކުޅުނީ ދެކުނު އެފްރިކާއިންނެވެ. ނަމަވެސް ދެކުނު އެފްރިކާއަށް އައިވަރީ ކޯސްޓްގެ ގޯލާ އަމާޒުކޮށް މާ އެދެވޭ ހަމަލާއެއް އުފެއްދިފައެއް ނުވެއެވެ. ނަމަވެސް އައިވަރީ ކޯސްޓުން ވަނީ ނުރައްކާތެރި ހަމަލާތަކެއް ދެކުނު އެފްރިކާގެ ގޯލާ އަމާޒުކޮށް ފޮނުވާލައިފައެވެ.
މެޗުގެ ފުރަތަމަ ހާފު ނިމުނީ 0-0 ގެ ނަތީޖާ އަކުންނެވެ.
މެޗްގެ ދެވަނަ ހާފުގައި ވެސް ގިނަ ވަގުތު ބޯޅަ ހިފަހައްޓައިގެން ކުޅުނީ ދެކުނު އެފްރިކާއިންނެވެ.
ނަމަވެސް މެޗުގެ 64 ވަނަ މިނެޓުގައި އައިވަރީ ކޯސްޓުން ވަނީ ދެކުނު އެފްރިކާގެ ގޯލު ފޫއަޅުވާލާ ގޯލެއް ކާމިޔާބު ކޮށްފައެވެ. މި ލަނޑު އެ ޓީމަށް ކާމިޔާބު ކޮށްދިނީ ޖޮނަތަން އެވެ.
މި ލަނޑަށް ފަހު ވެސް އައިވަރީ ކޯސްޓުން ވަނީ ދެކުނު އެފްރިކާގެ ގޯލަށް ނުރައްކާތެރި ހަމަލާތަކެއް ފޮނުވާލާފައެވެ.
މި ނަތީޖާއާ އެކު ގުރޫޕް 'ޑީ' ގެ އެއްވަނައަށް ތިން ޕޮއިންޓާ އެކު އައިވަރީ ކޯސްޓް ޖެހިލިއިރު ދެކުނު އެފްރިކާ އޮތީ ޓޭބަލްގެ ފުލުގައެވެ.
