ކުޅުން ހުއްޓާލަން އަދި ނުނިންމާކަމަށް ޕޯޓޯއަށް ކުޅެމުން އަންނަ އީކާ ކަސިޔަސް ބުނެފިއެވެ.

އުމުރުން 38 އަހަރުގެ ކަސިޔަސް ކުޅުން ހުއްޓާލަން އުޅޭކަމަށް ރިޕޯޓްތައް ބުނަމުންދިޔަ ދަނޑިވަޅެއްގައި، އޭނާ ކުރި ޓުވީޓެއްގައި ބުނީ އަދި ގޮތެއް ނުނިންމާ ކަމަށެވެ.

ކަސިޔަސް ކުޅުން ހުއްޓާލާނެކަމަށް ރިޕޯޓްތައް ބުނަން ފަށާފައިވަނީ އޭނާއަށް މިދިޔަ މަހު ހާޓް އެޓޭކެއް ޖެހި ކުޅުމަށް އަސަރުކޮށްފައިވާތީއެވެ. އޭނާއަށް ހާޓް އެޓޭކެއް ޖެހުނީ ޕޯޓޯގެ ފަރިތަކުރުމުގައި ބައިވެރިވަމުން ދަނިކޮށެވެ.

ނަމަވެސް ކަސިޔަސް ބުނީ، ކުޅުން ހުއްޓާލާނީ ޑޮކްޓަރ ދެއްވާ ލަފަޔަށް ބެލުމަށްފަހު ކަމަށާއި، އަދިވެސް ގޮތެއް ނުނިމޭ ކަމަށެވެ. އަދި އޭނާ ބުނީ، ކުޅެން ފުރުސަތު ލިބިއްޖެނަމަ، ކުޅުން ހުއްޓާލަން ނުވިސްނާ ކަމަށެވެ.

ކެރިޔަރުގައި މިހާތަނަށް 1،000 އަށްވުރެ ގިނަ މެޗު ކުޅެފައިވާ ކަސިޔަސް އޭނާގެ ކެރިޔަރު ފެށީ ރެއާލް މެޑްރިޑުންނެވެ. އޭނާ ވަނީ އެ ކްލަބަށް 700 އަށްވުރެ ގިނަ މެޗު ކުޅެ، 19 ތަށި ކާމިޔާބުކޮށްފައެވެ.

ރެއާލް ދޫކޮށްލުމަށްފަހު، ކަސިޔަސް މިހާރު ކުޅެމުން އަންނަ ޕޯޓޯއަށް ބަދަލުވީ 2015 ވަނަ އަހަރުގެ ސީޒަނުގައެވެ. އޭނާ ވަނީ އެ ކްލަބަށް މިހާތަނަށް 100 އަށްވުރެ ގިނަ މެޗު ކުޅެދީ، އެ ކްލަބާއެކު އެއް ލީގު ތަށި ކާމިޔާބުކޮށްފައެވެ.

ސްޕެއިން ގައުމީ ޓީމާއެކު ފީފާ ވޯލްޑް ކަޕް އަދި ދެ ޔޫރޯ ތަށި ކާމިޔާބުކޮށްފައިވާ ކަސިޔަސް ވަނީ އެޓީމަށް 167 މެޗު ކުޅެފައެވެ.