އޮސްޓްރޭލިއާގެ ގައުމީ ޓީވީ ކަމަށްވާ އޮސްޓްރޭލިއަން ބްރޯޑްކާސްޓިންގ ކޯޕަރޭޝަން، ނުވަތަ "އޭބީސީ" އިން 2017 ވަނަ އަހަރު ދެއްކި ރިޕޯޓްތަކަކާ ގުޅިގެން ފުލުހުން އެތަން ބަލާފާސްކޮށްފިއެވެ.
މި އޮޕަރޭޝަން ކުރިއަށް ގެންގޮސްފައި ވަނީ ބުދަ ދުވަހެވެ.
"އޭބީސީ"އިން 2017 ގައި ރިޕޯޓްކޮށްފައިވާ ގޮތުގައި، އޮސްޓްރޭލިއާގެ ސްޕެޝަލް ފޯސަސްއިން ވަނީ އަފްޣާނިސްތާނުގެ އެއްވެސް ކުށެއް ނެތް ފިރިހެނުންނާއި ކުޑަ ކުދިންތަކެއް މަރާލާފައެވެ. އަދި މި ރިޕޯޓްތައް ބިނާކޮށްފައި ވަނީ ސަރުކާރުގެ ތެރެއިން ހޯދާފައިވާ ޑޮކިއުމަންޓްތަކެއްގެ މައްޗަށް ކަމަށް "އޭބީސީ"އިން ބުންޏެވެ.
"ދަ އަފްޣާން ފައިލްސް"އަކީ ދެ އަހަރުގެ މަސައްކަތަށް ފަހު "އޭބީސީ"އިން ތައްޔާރު ކުރި އިންވެސްޓިގޭޓިވް ރިޕޯޓެކެވެ.
"އޭބީސީ"ގެ އެގްޒެކެޓިވް ޑައިރެކްޓަރ، ޖޯން ލިޔޯން ވިދާޅުވީ ސިޑްނީގައި ހުންނަ އޮފީސް ބަލާފާސް ކުރީ، ދެ އަހަރު ވަންދެން "ދަ އަފްޣާން ފައިލްސް"ގައި މަސައްކަތް ކުރި ތިން ރިޕޯޓަރުންނަށް އަމާޒުކޮށްގެން ކަމަށެވެ.
ރިޕޯޓަރުންގެ ނޯޓްތަކާއި، އީމެއިލް އާއި، ފުޓޭޖް، ރިޕޯޓްގެ ޑްރާފްޓްތަކުގެ އިތުރުން ޕާސްވޯޑްތައް ދިނުމަށް ބަލާފާސް ކުރުމަށް ހުއްދަދޭ އަމުރުގައިވާ ކަމަށް ލިޔޯން ފާހަގަ ކުރެއްވިއެވެ.
އޮސްޓްރޭލިއަން ފެޑަރަލް ޕޮލިސް އިން ބުނީ އޭބީސީ އޮފީސް ބަލާފާސް ކުރީ، ކްލެސިފައިޑް ނުވަތަ ސިއްރު މޭޓިރިއަލްތަކެއް ޕަބްލިޝް ކުރިކަމުގެ ތުހުމަތުގައި ކަމަށެވެ.
ބުދަ ދުވަހުގެ ރެއިޑްގެ އެއް ދުވަސް ކުރިން، ފުލުހުން ވަނީ "ނިއުސް ކޯޕް އޮސްޓްރޭލިއާ"ގެ ނޫސްވެރިއެއް ކަމަށްވާ އަނީކާ ސްމެތަރސްޓްގެ ގެ ބަލާފާސްކޮށްފައެވެ.
ނަމަވެސް، ފުލުހުން ވަނީ މި ދެ އޮޕަރޭޝަންގެ ގުޅުއްމެއް ވާކަމަށް އިންކާރުކޮށްފައެވެ.
މި ކަންތައް ކުށްވެރިކޮށް، އޮސްޓްރޭލިއާގެ ނޫސްވެރިންގެ ޔޫނިއަން ކަމަށްވާ "ދަ މީޑިއާ، އެންޓަޓޭންމަންޓް އެންޑް އާޓްސް އެލަޔަންސް" އިން ބުނި ގޮތުގައި، މިއީ ރައްޔިތުންގެ މަސްލަހަތު ހިމެނޭ މިފަދަ ކަންކަމުގެ ހަގީގަތް ގެނެސް ދިނުމަށް ނޫސްވެރިންނަށް ބިރު ދެއްކުމުގެ ގޮތުން ކުރާ ކަމަކެވެ.
