ރާއްޖޭގެ ޖަލުތަކުގެ ހާލަތު ރަނގަޅު ކުރަން އެންމެ ފުރަތަމަ އަޅަންޖެހޭ ފިޔަވަޅަކީ ހުރިހާ އެންމެންގެ ވިސްނުމަށް ހެޔޮބަދަލު ގެނައުން ކަމަށް މިނިސްޓަރ އޮފް ހޯމް އެފެއާޒް އިމްރާން އަބްދުﷲ ވިދާޅުވެއްޖެއެވެ.

މިނިސްޓަރު އެހެން ވިދާޅުވީ، ޖަލުތަކުގެ ލައިބްރަރީތަކަށް ފޮތް ހަދިޔާ ކުރުމުގެ ޕްރޮގްރާމް އިފްތިތާހު ކުރުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.

ޖަލުތަކުގެ ގައިދިން ފޮތް ކިޔުމަށް އަހުލުވެރި ކުރުވުމުގެ ގޮތުން މިނިސްޓަރު އިމްރާން އިސްނަންގަވައިގެން، މޯލްޑިވްސް ކަރެކްޝަނަލް ސަރވިސް ގުޅިގެން ބުދަ ދުވަހު ހެނދުނު އަމީނިއްޔާ ސްކޫލުގައި ފެށި ޕްރޮގްރާމްގައި، އާއްމުންނަށް ފޮތް ހަދިޔާ ކުރުމުގެ ފުރުސަތު ވަނީ ހުޅުވާލާފައެވެ.

ހޯމް މިނިސްޓަރު އިމްރާން ޖަލުގައި ހުންނެވި އިރު ކިޔުއްވި ތިން ފޮތެއް ވަނީ ލައިބްރަރީ އަށް ހަދިޔާ ކޮށްފައެވެ.

އެއީ، ސްޓެޕެން އާރް. ކޯވޭގެ '' ދަ ސެވެން ހެބިޓްސް އޮފް ހައިލީ އެފެކްޓިވް ޕީޕަލްއާ'' ޖެފެރީ އާޗާގެ ފެލްސް އިމްޕްރެޝަންއާ އުމް އަބްދުއްރަހްމާން ސަކީނާ ހިޝްފަލްޑާރ ލިޔެފައިވާ ދީނީ ފޮތެއް ކަމަށްވާ '' ހޫ އިޒް ﷲ'' އެވެ.

އެ ރަސްމިއްޔާތުގައި ވާހަކަ ދައްކަވަމުން ހޯމް މިނިސްޓަރު ވިދާޅުވީ، މީހަކު ކުރާ ކުށެއްގެ ސަބަބުން އެމީހަކު ޖަލުގައި ބަންދުވުމަކީ އެމީހެއްގެ ހުނަރުވެރިކަމުން މަހުރޫމް ވާންޖެހޭ ސަބަބެއް ނޫން ކަމަށެވެ.

ޖަލުގައި ގިނަ ދުވަސްތަކެއް އުޅުއްވަން ޖެހިވަޑައިގަތް އިމްރާން ވިދާޅުވީ، ޖަލުގައި ހޭދަކުރާ ވަގުތަކީ އުގެނުމާއި ދަސްކުރުމަށް ރަނގަޅު ފުރުސަތަކަށް ވެގެން ދާނެ ކަމާއި، ޖަލުތަކުގެ ހާލު ރަނގަޅު ކުރުމަށް މި ސަރުކާރުން އަމާޒު ހިފާފައިވާ ކަމަށެވެ.

ހުރިހާ ފަރާތްތަކެއްގެ އެހީތެރިކަމާއެކު ޖަލުތަކުގެ ލައިބްރަރީތައް އެކަށީގެންވާ ވަރަށް މުއްސަނދިކުރުމުގެ ފުރުޞަތު ލިބިގެންދާނެކަން މިނިސްޓަރ ފާހަގަކުރެއްވިއެވެ. މިކަން ވެގެންދާނީ ޖަލުތަކުގެ ހާލަތު ރަނގަޅުކުރުމަށް ކުރަމުންގެންދާ މަސައްކަތަށް ލިބިގެންދާ ބޮޑު ބާރަކަށް ކަމަށް މިނިސްޓަރ ވިދާޅުވިއެވެ.

އެ ރަސްމިއްޔާތުގައި ކޮމިޝަނަރ އޮފް ޕްރިޒަންސް އަބުދުﷲ މުނާޒްއާ ހޯމް މިނިސްޓްރީގެ އިސްބޭފުޅުންގެ އިތުރުން ކަރެކްޝަނަލް ސަރވިސްގެ އޮފިސަރުން ބައިވެރިވިއެވެ.

ބުދަ ދުވަހުން ފެށިގެން ހޮނިހިރު ދުވަހުގެ ރޭގެ ނިޔަލަށް ފޮތް ހަދިޔާ ކުރުމުގެ ޕްރޮގްރާމް އަމީނިއްޔާ ސްކޫލްގެ ހޯލްގައި ކުރިޔަށްދާނެއެވެ.

ފޮތް ހަދިޔާކުރުމުގެ ފުރުޞަތު އޮންނާނީ ހެނދުނު 10:00 ން 15:00 އަށް އަދި ރޭގަނޑު 21:00 ން 23:00 އަށެވެ. ހުކުރު ދުވަހު އޮންނާނީ ރޭގަނޑު 21:00 ން 23:00 އަށެވެ.