މެންޗެސްޓާ ޔުނައިޓެޑުން ބަޔާން މިއުނިކަށް ކުޅެމުން އަންނަ ރޮބާޓް ލެވަންޑޯސްކީ ހޯދުމަށް މަސައްކަތް ކުރަމުން އަންނަ ކަމަށް ރިޕޯޓްތައް ބުނެފިއެވެ.

ޑެއިލީ މެއިލްއިން ބުނީ، ކުރިޔަށް އޮތް ސީޒަނަށް އަމާޒުކޮށް ޔުނައިޓެޑުން ލެވަންޑޯސްކީގެ ސޮއި ބޭނުންވާ ކަމަށާއި، އެކަމަށް އެ ކްލަބުން މިހާރު މަސައްކަތް ފަށާފައިވާ ކަމަށެވެ.

ނަމަވެސް ބައެއް ރިޕޯޓްތައް ބުނާގޮތުން ބަޔާންއިން ބޭނުންވަނީ ލެވަންޑޯސްކީ އެކްލަބުގައި ބަހަޓާށެވެ. އެގޮތުން އޭނާގެ އެއްބަސްވުންވެސް އާކުރަން އެ ކްލަބުން މަސައްކަތް ކުރަމުން އަންނަ ކަމަށް ރިޕޯޓްތައް ބުނެއެވެ.

އުމުރުން 30 އަހަރުގެ ލެވަންޑޯސްކީގެ އެއްބަސްވުން 2021 ވަނަ އަހަރު ހަމަވާއިރު، ކުރިޔަށް އޮތް ސީޒަނަށް އަމާޒުކޮށް ޔުނައިޓެޑުގެ އިތުރުން ގިނަ ކްލަބްތަކުން އަންނަނީ އޭނާ ހޯދުމަށް މަސައްކަތް ކުރަމުންނެވެ.

ބްރޫޝިއާ ޑޯޓްމަންޑުން ވިދާލި ލެވަންޑޯސްކީ ވަނީ އެޓީމާ އެކު ގިނަ ކާމިޔާބީތަކެއް ހޯދާފަ އެވެ. އެގޮތުން އޭނާ ވަނީ އެޓީމަށް ހަތަރު ސީޒަން ކުޅެ، ބުންޑަސްލީގާ ދެފަހަރު، ޖަރުމަން ކަޕް އަދި ޖަރުމަން ސުޕަކަޕްވެސް ކާމިޔާބުކޮށްފަ އެވެ. ޑޯޓްމަންޑް ދޫކޮށް ލެވަންޑޯސްކީ ބަޔާން އަށް ބަދަލުވީ 2014 ވަނަ އަހަރެވެ. އޭނާ ވަނީ މިހާތަނަށް އެޓީމަށް ކުޅުނު 240 މެޗުގައި 189 ލަނޑު ކާމިޔާބުކޮށްފަ އެވެ. އަދި ލެވަންޑޯސްކީ ވަނީ ބުންޑަސް ލީގާ ތިންފަހަރު، ޖަރުމަން ކަޕް އެއްފަހަރު އަދި ޖަރުމަން ސުޕާކަޕް ދެފަހަރު އެޓީމާއެކު ކާމިޔާބުކޮށްފަ އެވެ.ޕޮލެންޑްގެ ގައުމީ ޓީމުގެ ކެޕްޓަންކަން ކުރަމުން އަންނަ ލެވަންޑޯސްކީ ވަނީ އެ ގައުމަށް މިހާތަނަށް ކުޅުނު 104 މެޗުގައި 56 ލަނޑު ކާމިޔާބުކޮށްދީފަ އެވެ.