ރައީސް އިބްރާހިމް މުހައްމަދު ސޯލިހްގެ ސަރުކާރުން ކުރިއަށްގެންދާ ތަރައްޤީގެ މަޝްރޫއުތައް ދާދި އަވަހަށް، ބާރު ސްޕީޑްގައި ފެށިގެންދާނެ ކަމަށް ރައީސް އޮފީހުގެ ޗީފް އޮފް ސްޓާފް އަލީ ޒާހިރު ވިދާޅުވެއްޖެ އެވެ.
މި ސަރުކާރުން، ތަރައްްޤީގެ އެއްވެސް މަޝްރޫއެއް ފަށައިގެން ކުރިއަށް ނުގެންދާ ކަމަށް ބުނެ އިދިކޮޅު ފަރާތްތަކުން ދައްކާ ވާހަކައަށް ރައްދުދީ، އަދާލަތު ޕާޓީގެ ނައިބު ރައީސްކަން ވެސް ކުރައްވާ އަލީ ޒާހިރު ވިދާޅުވީ މި ސަރުކާރުން ތަރައްޤީގެ ނަމުގައި އެއްވެސް ރޭވުންތެރިކަމެއް ނެތި، ގާ ފުރޮޅާ، ތަންތަން ސުންނާފަތިކޮށް ނުހަދާނެ ކަމަށެވެ. އަދި އޭގެ ބަދަލުގައި މަޝްރޫއުތައް ކުރިއަށްގެންދާނީ ވިސްނުންތެރިކަމާ އެކު އެތައް އަހަރަކަށް ޕްލޭން ކުރެވިގެން ކަމަށެވެ.
އަލީ ޒާހިރު ވިދާޅުވީ، އެގޮތަށް ކުރިއަށްގެންދާ ދެމެހެއްޓެނިވި ތަރައްޤީގެ މަޝްރޫއުތައް ދާދި އަވަހަށް ބާރު ސްޕީޑްގައި ހިންގަން ފަށާ، މަންޒަރު ފެންނާނެ ކަމަށެވެ.
Misarukaarun tharaggige namuga eyves reyvuntherikameh nethi GAAFUROLHA thanthan sunnaafathi koh nuhadhaane. Eyge badhaluga visnuntherikama eku ethah aharakah plan kurevigen, dhemehettenivi tharaggige mashroouthah dhaadhi avahah baaru speedgai hinganfasha manzaru fennaane. IA
— Ali Zahir (alipi) (@alixahir) May 13, 2019
މި ސަރުކާރުން ވެރިކަމާ ހަވާލުވުމަށް ފަހު ގިނަ ރަށްރަސުގެ ބަނދަރާއި، ފެނާއި، ނަަރުދަމާ ޤާއިމްކުރުމުގެ މަސައްކަތްތައް ވެސް އަންނަނީ ކުރިއަށް ގެންދަމުންނެވެ. އަދި ބިން ހިއްކުމުގެ މަސައްކަތްތައް ފެށުމަށް ތައްޔާރުވަމުން އަންނައިރު، އިތުރު ރަށްރަށަށް ބޭނުންވާ އަސާސީ ހިދުމަތްތައް ފޯރުކޮށްދިނުމުގެ މަސައްކަތް ވެސް ސަރުކާރުން އަންނަނީ ކުރިއަށްގެންދަމުންނެވެ.
ރައީސް އިބްރާހިމް މުހައްމަދު ސޯލިހް ވިދާޅުވެފައި ވަނީ އެމަނިކުފާނުގެ ސަރުކާރުގައި އެންމެ އިސްކަމެއްދޭނީ ރައްޔިތުންނަށް އަސާސީ ހައްޤުތައް ކަށަވަރުކޮށްދިނުމަށް ކަމަށެވެ.
އަލީ ޒާހިރު މިހެން ވިދާޅުވެފައިވާ އިރު މި ސަރުކާރު ބޮޑު މަޝްރޫއެއް ނުފަށާތީ އާއި އަދި ކުރީގެ ސަރުކާރުން ފަށާފައިވާ ބިޔަ މަޝްރޫއުތައް އެކަށީގެންވާ ހަލުވި މިނެއްގައި ކުރިއަށް ނުދޭތީ ގިނަ ބަޔަކު ދަނީ ފާޑުކިޔަމުންނެވެ. އަދި ކަންކަން ހައްލުކުރަން އައި ސަރުކާރަކުން ރައްޔިތުން އުންމީދުކުރާ މިންވަރާ ގާތަށް ވެސް ކަންކަން އިސްލާހުނުކުރާތީ ވެސް ވަނީ ފާޑުކިޔުން އަމާޒުވެފައެވެ.
