އުރީދޫ މޯލްޑިވްސް ޕލކ އިން އެކުންފުނީގެ އިންޑިޕެންޑެންޓް ބޯޑު ޑިރެކްޓަރެއްގެ ގޮތުގައި އަދި އައު ޗެއަރމަންގެ ގޮތުގައި މިސްޓަރ ޑޭމިއަން ފިލިޕް ޗެޕަލް އައްޔަން ކޮށްފިއެވެ.
އުރީދޫއިން އާންމުކުރި ބަޔާނެއްގައި ބުނެފައިވަނީ އަލަށް އައްޔަން ކުރި ޗެއަރމަން ޑޭމިއަން ފިލިޕް ޗެޕަލްއަކީ އުރީދޫ މޯލްޑިވްސްގެ މައި ހިއްސާދާރު ކަމުގައިވާ ވަތަނިއްޔާ އިންޓަރނޭޝަނަލް އެފްޒެޑް-އެލްއެލްސީ އިން ނޮމިނޭޓް ކޮށްފައިވާ ރެޕްރެޒެންޓެޓިވް ކަމަށެވެ..
މިސްޓަރ ޗެޕަލް މިހާރު މަސައްކަތް ކުރައްވަމުން ގެންދަވަނީ އުރީދޫ ގަތަރުގެ ޗީފް ކޮންސިއުމަރ އޮފިސަރުގެ މަގާމުގައެވެ.
އޭނާއަކީ ޓެލެކޮމިއުނިކޭޝަން ދާއިރާގައި 17 އަހަރަށް ވުރެ ގިނަ ތަޖުރިބާ ހޯއްދަވާފައިވާ އޮސްޓްރޭލިޔާ ގެ ރައްޔިތެކެވެ.
މިސްޓަރ ޗެޕަލް ވަނީ އޮސްޓްރޭލިއާގެ ސްވައިންބާން ޔުނިވަރސިޓީ އޮފް ޓެކްނޮލޮޖީ އިން އެޕްލައިޑް ސައިންސް، އިންފޮމޭޝަން ޓެކްނޮލޮޖީ ގެ ދާއިރާއިން ބެޗަލަރސް ޑިގްރީ ހާސިލު ކޮށްފައެވެ.
މިސްޓަރ ޗެޕަލްގެ ޤާބިލް ލީޑަރޝިޕްގެ ދަށުން، އުރީދޫ މޯލްޑިވްސް އިން ކުރިމަގުގައި ގިނަގުނަ ކާމިޔާބީތައް ހޯދާނެކަމުގެ އުންމީދުކުރާ ކަމަށް އެކުންފުނިން ވަނީ ބުނެފައެވެ.
