ހާރިޖީ ވަޒީރު އަބްދުﷲ ޝާހިދު ލަންކާގެ ކުރީގެ ރައީސް އަދި މިހާރު އެންމެ ބޮޑު އިދިކޮޅު ޕާޓީގެ ލީޑަރު މަހިންދަ ރާޖަޕަކްސައާ ބައްދަލުކުރައްވައިފިއެވެ.
މިނިސްޓަރ ޝާހިދު ލަންކާއަށް މިހާރު ކުރައްވަމުން ގެންދަވާ ދަތުރުފުޅުގައި ރާޖަޕަކްސައާ ބައްދަލުކުރެއްވުމަށް ފަހު ކުރި ޓްވީޓެއްގައި ވިދާޅުވީ ގިނަ ދިވެހިންތަކެއް ދިރިއުޅެމުން އަންނަ ލަންކާއާ އެކު ޓެރަރިޒަމާ ދެކޮޅަށް ގުޅިގެން މަސައްކަތްކުރާނެ ކަމުގެ ޔަގީންކަން ދެއްވާ ކަމަށެވެ. ޝާހިދު ވިދާޅުވީ ރާޖަޕަކްސައާ ބައްދަލުކުރެއްވުމަކީ ލިބިވަޑައިގެންނެވި ފަހުރެއް ކަމަށެވެ.
It was an honor calling on former President of Sri Lanka HE @PresRajapaksa. Expressed solidarity with the people of Sri Lanka - the second home to many Maldivians. Maldives stand shoulder to shoulder with Sri Lanka in the fight against terrorism. pic.twitter.com/27KmqHwvA7
— Abdulla Shahid (@abdulla_shahid) May 8, 2019
މި ބައްދަލުކުރެއްވުމަށް ފަހު ރާޖަޕަކްސަ ކުރެއްވި ޓްވީޓްގައި ވިދާޅުވީ ދިވެހިރާއްޖެ އިން ހިފަހައްޓާފައިވާ ލަންކާގެ ހަތަރު މަސް ބޯޓާއި އެ އުޅަނދު ފަހަރުން ހައްޔަރުކުރެވުނު ފަޅުވެރިން ދޫކޮށްލާނެ ކަމަށް ވިދާޅުވި ކަމަށެވެ. ރާޖަޕަކްސަ ވިދާޅުވީ އީސްޓަރ ސަންޑޭގައި ލަންކާގައި ދިން ހަމަލާއާ ގުޅިގެން ރައީސް އިބްރާހިމް މުހައްމަދު ސޯލިހާ ދިވެހި ރައްޔިތުންގެ ފަރާތުން މިނިސްޓަރ ޝާހިދު ތައުޒިޔާ ވިދާޅުވި ކަމަށެވެ.
Hon. Abudulla Shahid, Minister Foreign Affairs of Maldives called on me to convey condolences on behalf of his President & people for the Easter Sunday terrorist attacks. He also stated that his govt. had decided to release the 4 boats & the Sri Lankan fishermen in their custody. pic.twitter.com/nFotCaXVZe
— Mahinda Rajapaksa (@PresRajapaksa) May 8, 2019
ރާޖަޕަކްސައާ އެކު ބޭއްވެވި ބައްދަލުކުރެއްވުމުގައި ހާރިޖީ ވަޒީރު ޝާހިދު އަރިހުގައި ދިވެހިރާއްޖެ އިން ލަންކާއަށް ކަނޑައަޅުއްވާފައި ހުންނަވާ ސަފީރު އުމަރު އަބްދުލް ރައްޒާގް ބައިވެރިވަޑައިގެންނެވިއެވެ.
މިނިސްޓަރ ޝާހިދު މިހާރު ލަންކާއަށް ކުރައްވަމުން ގެންދަވާ ދަތުރުފުޅުގައި އެ ގައުމުގެ ބޮޑުވަޒީރު ރަނިލް ވިކްރަމަސިންހަ އަދި ގާނޫނުހަދާ މަޖިލީހުގެ ރައީސް ކަރޫ ޖަޔަސޫރިޔާއާ ބައްދަލުކުރައްވާފައިވެއެވެ. މީގެ އިތުރުން އެ ގައުމުގެ ގާނޫނުހަދާ މަޖިލީހުގެ ކުރީގެ ރައީސް ޗަމަލް ރާޖަޕަކްސަ އަދި އެ ގައުމުގެ މިނިސްޓަރ އޮފް އިންޓަރނަލް އެންޑް ހޯމް އެފެއަރޒް ވަޖިރަ އަބޭވަރްދަނައާ ބައްދަލުކުރައްވާފައިވެއެވެ.
