އެސްއެސްސީ އިމްތިހާނުގައި ޤުރުއާން ވަކި މާއްދާއެއްގެ ގޮތުގައި ހިމަނަން މިނިސްޓްރީން އޮފް އެޑިއުކޭޝަނުން ނިންމައިފިއެވެ.

އެޑިއުކޭޝަން މިނިސްޓްރީން ބުނީ އަންނަ އަހަރުން ފެށިގެން އެސްއެސްސީ އިމްތިހާނުގައި ޤުރުއާން މާއްދާ ވަކިން ހިމަނާނެ ކަމަށެވެ.

އެ އިމްތިހާނުގައި ޤުރުއާން ވަކި މާއްދާއެއްގެ ގޮތުގައި ހިމެނުމުގެ ސަބަބުން ޤުރުއާނަށް ދަރިވަރުން އަހުލުވެރިވެގެންދާނެ ކަމަށާއި ދަރިވަރުންނަށް މި މާއްދާ އުގަންނައިދިނުމަށް އިތުރަށް ސަމާލުކަން ދީ، މި އިލްމު ފުޅާކުރުމަށް ގިނަ މަސައްކަތްތަކެއް ކުރެވިގެންދާނެ ކަމަށެވެ.

އެސްއެސްސީ އިމްތިހާނުގައި މި މާއްދާއަށް މާކްސް ދޭނީ ސްކޫލުގެ އިންޓާނަލް އެސެސްމަންޓުން 60 އިންސައްތަ މާކްސް ބާކީ 40 އިންސައްތަ ނަގާނީ ޕަބްލިކް އެގްޒަމިނޭޝަނުން ނުވަތަ ޕްރޮޖެކްޓް އެސެސްމަންޓްތަކުން ކަމަށް އެ މިނިސްޓްރީން ބުނެއެވެ.

އެސްއެސްސީ އިމްތިހާނުގައި މިހާތަނަށް ހަދަމުން އައީ ދިވެހި އަދި އިސްލާމް މި ދެ މާއްދާގެ އިމްތިހާނެވެ.