ސްރީލަންކާގެ ބޮމުގެ ހަމަލާއަށް ހަފްތާއެއް ވީއިރު އެ ގައުމުގެ ހުރިހާ ސަރަހަދެއްގައި އާދީއްތަ ދުވަހުގެ ރޭ ކަރފިއު ނުހިންގާނެ ކަމަށް ފުލުހުންގެ ތަރުޖަމާނު އެސްޕީ ރުވާން ގުނަސޭކަރަ ވިދާޅުވެއްޖެއެވެ.

ކަލުމުނެއި،ސަމަންތުރެއި އަދި ޗާވަލަކަޑައިގައި ހަވީރު 5ން ފެށިގެން ކަރފިއު ކުރިޔަށް ގެންދެއެވެ. ތަރުޖަމާނު ވިދާޅުވިގޮތުގައި އެ ސަރަހައްދުތަކުގައި އިތުރު އެންގުމެއް އަންގަންދެން ކަރފިއު ހިންގާނެއެވެ.

މީގެ އިތުރުން ފުލުހުންގެ ތަރުޖަމާނުވަނީ ވޭތުވެދިޔަ 24 ގަޑިއިރު ހިންގި އޮޕަރޭޝަނުގައި ތުހުމަތު ކުރެވޭ 48 މީހަކު ހައްޔަރު ކޮށްފައިވާކަމަށް ބުނެފައެވެ.

އޮޕަރޭޝަން ހިންގާފައިވަނީ ފުލުހުންނާއި އަސްކަރިއްޔާ އަދި ފުލުހުންގެ ސްޕެޝަލް ޓާސްކް ފޯސްގުޅިގެންނެވެ.

އާދީއްތަ ދުވަހު ފުލުހުން ވަނީ  ބޮމުގެ ހަމަލާތަކުގެ  މޭސްތިރި ކަމަށް ޝައްކުކުރެވޭ ޒަހްރާން ހާޝްމީ ދިރިއުޅޭ ކަމަށް ބެލެވޭ ގެއެއް ބަލާ ފާސްކޮށްފައެވެ

ބަޓިކަލޯގައި ހުންނަ މި ގެ ބަލާ ފާސްކުރުމަށް ފަހު ގެ ބަލަހައްޓާ ފަރާތްވަނީ ހައްޔަރު ކޮށްފައެވެ. މި ގޭގެ ތެރެެއިން ހަމަލާގައި ބޭނުންކުރި ކަމަށް ތުހުމަތުކުރެވޭ އެއްވެސް އެއްޗެއް ފެނިފައި ނުވި ނަމަވެސް ޓާސްކް  ފޯސްއިން ގަބޫލުކުރާ ގޮތުގައި އޭޕްރީލް މަހުގެ 21 ވަނަ ދުވަހު ދިން ހަމަލާތައް ރޭވުމުގައި އެ ގެ ބޭނުން ކޮށްފައިވެއެވެ.

ލަންކާގައި ދީފައިވާ މި ހަމަލާ އަމާޒު ކޮށްފައިވަނީ ޓޫރިސްޓް ތިން ހޮޓަލަކަށާއި ތިން ކްރިސްޓިއަނުންގެ ތިން ފައްޅިއަކަށެވެ.

އެކުއެކީގައި ދިން ހަމަލާތައް ފުރަތަމަ އަމާޒުވި ހޮޓާތަކުގެ ތެރޭގައި ޝަންގްރީލާގެ އިތުރުން ކިންގްސްބަރީ އާއި ސިނަމަން ހިމެނެއެވެ.

މީގެ އިތުރުން އެ ވަގުތުގައި ދިން ހަމަލާތައް ދެން އަމާޒުވެފައި ވަނީ ނިގަމްބޯއާއި، ބަޓިކަލޯއާ އަދި ކޮލަމްބޯގެ ކޮއްޗިކަޑައިގެ ތިން ފައްޅިއަކަށެވެ. 

އޭގެ ފަހުން ވެސް އިތުރު ތަންތަނަށް ހަމަލާ ދީފައިވެއެވެ. މި ހަމަލާތަކުގައި މަރުވި މީހުންގެ އަދަދު 253 އަށް އަރައެވެ.