އެމެރިކާގައި 2020 ވަނަ އަހަރު ބާއްވާ ރިޔާސީ އިންތިހާބުގައި ވާދަ ކުރުމަށް ޑިމޮކްރެޓިކް ޕާޓީގެ 20 ފަރާތެއް ޝައުގުވެރިކަން ފާޅު ކުރައްވައިފިއެވެ.

ޑިމޮކްރެޓިކް ޕާޓީގެ ޓިކެޓަށް ވާދަ ކުރައްވާ ފަރާތްތަކުގެ ތެރޭގައި އެ ގައުމުގެ ކުރީގެ ނައިބު ރައީސް ޖޯ ބައިޑެން ވެސް ހިމެނެއެވެ. 2020ގެ އިންތިހާބުގައި ވާދަ ކުރައްވަން ނިންމެވިކަން ކުރީގެ ރައީސް ބަރަކް އޮބާމާގެ ނައިބު، ބައިޑެން އިއުލާން ކުރައްވާފައިވަނީ މި ހަފްތާގައެވެ.

މީގެ އިތުރުން، މި ޓިކެޓަށް ވާދަ ކުރާ 20 ފަރާތުގެ ތެރޭގައި ހަ އަންހެންނުން ވެސް ހިމެނެއެވެ. އެއީ، ކަމަލާ ހެރިސް، ކަރސްޓަން ގިލިބްރޭންޑް، ތުލްސީ ގަބާޑް، އޭމީ ކްލޮބުކަރ، އެލިޒަބަތު ވޮރެން އަދި މިރިއެން ވިލިއަމްސަން އެވެ.

މީގެ އިތުރަށް ޝައުގުވެރިކަން ފާޅު ކުރެއްވި ފަރާތްތަކަކީ، ބަރނީ ސޭންޑަރސް، ކޯރީ ބުކަރ، ޕީޓް ބޫޓަޖަޖް، ޖޫލިއަން ކާސްޓްރޯ، ޖޯން ޑިލެނީ، ޖޯން ހިކަންލޫޕަރ، ޖޭ އިންސްލީ، ވޭން މެސަމް، ސެތި މައުލްޓަން، ބެޓޯ އޯ'ރޯކް، ޓިމް ރަޔަން، އެރިކް ސްވަލްވެލް އަދި އެންޑްރޫ ޔޭންގް އެވެ.

3 ނޮވެމްބަރ 2020 ގައި އޮންނަ އިންތިހާބުގައި ވާދަ ކުރެއްވުމަށް ޝައުގުވެރިވާ ފަރާތްތަކުގެ މެދުގައި އޮންނަ ޕާޓީގެ ފުރަތަމަ ޕްރައިމަރީ އޮންނާނީ އަންނަ ފެބްރުއަރީ މަހުއެވެ.

އަންނަ ރިޔާސީ އިންތިހާބުގައި ދެ ވަނަ ދައުރަކަށް ވާދަ ކުރައްވަން މިހާރުގެ ރައީސް، ޑޮނަލްޑް ޓްރަމްޕް ވަނީ ނިންމަވާފައެވެ. އެ މަނިކުފާނަކީ ރިޕަބްލިކަން ޕާޓީގެ މެމްބަރެކެވެ. ދެ ވަނަ ދައުރަކަށް ކުރިމަތި ލައްވާން ނިންމަވާ އެ ކަމަށް ޓްރަމްޕް މަސައްކަތް ފައްޓަވާފައިވަނީ ވެރިކަމާ ހަވާލު ވެވަޑައިގެންނެވިތާ ދުވަސް ކޮޅެއް ފަހުންނެވެ. އަދި 2020ގެ އިންތިހާބުގައި އެ މަނިކުފާނުގެ ރަނިންގ މޭޓަކީ، 2016 ވަނަ އަހަރުގެ ރަނިންގ މޭޓް އަދި މިހާރު ނައިބު ރައީސް ކަމަށްވާ މައިކް ޕެންސް ކަމަށް ޓްރަމްޕް ވަނީ 2018 ވަނަ އަހަރުގެ ނޮވެމްބަރު މަހު އިއުލާން ކުރައްވާފައެވެ.