ސްރީ ލަންކާއިން ފުލުހުން ހައްޔަރުކޮށްފައިވާ ހަ ދިވެހިންގެ ތެރެއިން ދެ މީހެއް ބަންދުގެ މުއްދަތު އަންނަ މަހުގެ 10 ވަނަ ދުވަހާއި ހަމައަށް އިތުރުކޮށްފައިވާ ކަމަށް ރާއްޖެ އެމްވީއަށް މައުލޫމާތު ލިބިއްޖެއެވެ.
ހަ މީހުންގެ ތެރެއިން ދެ މީހެއްގެ ބަންދުގެ މުއްދަތު އިތުރު ކޮށްފައިވާއިރު، ދެން ބާކީ ތިބި މީހުންގެ ބަންދާއި މެދު ނިންމާފައިވާ ގޮތުގެ ތަފްސީލެއް އަދި ލިބިފައެއް ނުވެއެވެ.
އެ މީހުންގެ މައުލޫމާތާއި އެ މީހުންގެ މައްޗަށް ކުރާ ތުހްމަތުތަކާ ގުޅޭ ގޮތުން ފޮރިން މިނިސްޓްރީން އަދި ބަހެއް ނުބުނެ އެވެ. ފޮރިން މިނިސްޓްރީގެ ޑިރެކްޓަރ ކޮމިއުނިކޭޝަން މިއުވާން މުހައްމަދު "ރާއްޖެއެމްވީ"އަށް ވިދާޅުވީ ހައްޔަރުކޮށްފައިވާ ދިވެހިންގެ ކަންކަން ލަންކާގައި ހުންނަ ދިވެހި އެމްބަސީން ގެންދަނީ ބަލަމުންނެވެ.
ރާއްޖެއެމްވީއަށް އެނގިފައިވާ ގޮތުގައި، ސްރީ ލަންކާގެ ފުލުހުން ހައްޔަރުކޮށްފައިވާ ހަ މީހުންގެ ތެރެއިން ހަތަރު މީހުން ހައްޔަރުކުރީ ބުރާސްފަތި ދުވަހުއެވެ. އަނެއް ދެ މީހުން ހައްޔަރުކުރީ ހުކުރު ދުވަހުއެވެ.
މިދިޔަ އާދީއްތަ ދުވަހު ސްރީ ލަންކާގައި ދިން ބޮމުގެ ހަމަލާއަށް ފަހު އެ ގައުމުގެ ފުލުހުން ހާއްސަ އޮޕަރޭޝަނެއް ފަށާފައިވާއިރު، އެ އޮޕަރޭޝަނަށް ލަންކާގައި ދިރިއުޅޭ ދިވެހިން ވެސް އެއްބާރުލުން ދިނުމަށް މިއުވާން އިލްތިމާސް ކުރެއްވެވިއެވެ.
