ސްރީލަންކާގައި މޫނު ބުރުގާ އެޅުން މަނާކުރާ ބިލެއް އެ ގައުމުގެ ގާނޫނު ހަދާ މަޖިލީހަށް ހުށަހަޅަން ނިންމައިފިއެވެ.

އެ ބިލް ގާނޫނު ހަދާ މަޖިލީހަށް ހުށަހަޅަނީ ނެޝަނަލް ލިސްޓްގެ މެމްބަރު ޕޮރެފެސަރު އަޝޫ މަރަސިންގެހެވެ.

ވެރިކަން ކުރާ ޔޫއެންޕީ ޕާޓީއަށް ނިސްބަށްވެވަޑައިގަންނަވާ އެ މެމްބަރު ބިލް ހުށައަޅަނީ އަމިއްލަ ހައިސިއްޔަތުންނެވެ. ޔޫއެންޕީ އޮފީހުގައި މީޑިއާ ވާހަކަ ދައްކަވަމުން އަޝޫ ވިދާޅުވީ، އަންހެނުން މޫނު ބުރުގާ އެޅުމަކީ ސީދާ އިސްލާމް ދީނުގެ ފޭރަމެއް ނޫން ކަމަށާއި، ގިނަ މުސްލިމް ސިޔާސީ ލީޑަރުން ވެސް އެކަމާ އެއްބަސްވެފައިވާ ކަމަށެވެ.

ފިރިހެނުން ވެސް މޫނު ބުރުގާ އަޅައިގެން ޓެރަރިޒަމްގެ އަމަލުތައް ހިންގަމުންދާ ކަމަށް އަޝޫ ވިދާޅުވިއެވެ. އެ ބިލަށް މުސްލިމުންގެ އެއްބާރުލުން ލިބޭނޭ ކަމަށް ގަބޫލު ކުރައްވާ ކަމަށާއި، އެކަމާ ބެހޭ ގޮތުން މުސްލިމުން އިތުރަށް ހޭލުންތެރިވާން ޖެހޭ ކަމަށް މެމްބަރު އަޝޫ ވިދާޅުވިއެވެ.

ސްރީލަންކާގެ މުސްލިމުން އަންހެނުންގެ ތެރެއިން މޫނު ބުރުގާ އަޅާ އަންހެނުންގެ އަދަދު މަދު ކަން އަޝޫ ވަނީ ފާހަގަކުރައްވާފައެވެ. އަޝޫ ހުށަހެޅި ބިލަށް ކޮލަމްބޯ ޑިސްޓްރިކްޓްގެ މުސްލިމު މެމްބަރު މުޖީބުއް ރަހްމާން ވަނީ ތާއިދު ކުރައްވާފައެވެ. މުޖީބް ވިދާޅުވީ، މޫނު ބުރުގާ އެޅުމަކީ ސްރީލަންކާގެ އަންހެން މުސްލިމުންގެ ތެރޭގައި އެއްވެސް އިރަކު އޮތް ސަގާފަތެއް ނޫންކަމަށެވެ. ޓެރަރިސްޓު ހިންގަމުންދާ އަމަލުތަކުގެ ސަބަބުން މުސްލިމުން ވެސް ތިބެނީ ބިރުވެރިކަމެއްގެ ތެރޭގައި ކަމަށް އޭނާ ވިދާޅުވިއެވެ.

ލަންކާގެ ފައްޅިތަކާއި ހޮޓާތަކަށް އާދިއްތަ ދުވަހު ދިން ހަމަލާގައި ގިނަ އަންހެނުންތަކެއް ބައިވެރިވެފައިވާ ކަމަށް ޝައްކު ކުރެވިފައިވާއިރު މޫނު ބުރުގާ މަނާ ކުރުމަށް ވަޒީރުންގެ މަޖިލީހުން ރައީސް މައިތިރިޕާލަ ސިރިސެނާއަށް އަރުވާފައިވާ ކަމަށް ލަންކާގެ ސަރުކާރުގެ އޮފިޝަލުންނާއި ހަވާލާދީ ބައެއް ރިޕޯޓްތައް ބުނެއެވެ. 

ލަންކާގެ އަބާދީގެ 9.7 ޕަސެންޓަކީ މުސްލިމުންނެވެ. ލަންކާގެ މުސްލިމުންގެ އަދަދަކީ 1.9 މިލިއަނެވެ. މުސްލިމުން އެންމެ ގިނައީ އަމްޕާރަ ޑިސްޓްރިކްޓްގައެވެ. ދެހާސް ބާރަވަނަ އަހަރުގެ ބޯހިމެނުން ދައްކާ ގޮތުން އަމްޕާރަ ޑިސްޓްރިކްޓްގެ 43 ޕަސެންޓަކީ މުސްލިމުންނެވެ.