އާދީއްތަ ދުވަހު ސްރީލަންކާއަށް ދިން ބޮމުގެ ހަމަލާތަކަކީ ނިއުޒިލެންޑަށް ދިން ހަމަލާތަކުގެ ބަދަލުހިފުމެއް ކަމެއް އެނގިފައި ނުވާ ކަމަށް ނިއުޒިލެންޑުން ބުނެފިއެވެ.
ނިއުޒިލެންޑުގެ ބޮޑުވަޒީރު ޖަސިންޑާ އާޑެން ބުދަ ދުވަހު ވިދާޅުވީ އެގައުމުގެ އިންޓަލިޖެންސަށް އެކަހަލަ މައުލޫމާތެއް ލިބިފައި ނެތް ކަމަށެވެ.
ލަންކާގެ ޑިފެންސް މިނިސްޓަރ ރުވާން ވިޖެވަރްދަނާ އަންގާރަ ދުވަހު މަޖިލިސް ކުރާގޭގައި ވިދާޅުވީ ތަހުގީގު ތަކުން އެނގޭ ގޮތުގައި ލަންކާއަށް ދިން ހަމަލާތަކަކީ ނިއުޒިލެންޑަށް ދިން ހަމަލާތަކުގެ ބަދަލު ކަމަށެވެ.
ލަންކާއަށް ދިން ހަމަލާތަކުގައި މަރުވި މީހުންގެ އަދަދު މިހާތަނަށް 321އަށް އަރައެވެ. ނިއުޒިލެންޑުގެ ދެ މިސްކިތަކަށް ހަމަލާ ދީފައިވަނީ މުސްލިމުން ހުކުރު ނަމާދަށް ތިއްބައި މާޗް މަހުގެ 15 ވަނަ ދުވަހުއެވެ.
ޖެސިންޑާ ވިދާޅުވީ ލަންކާއަށް ދިން ހަމަލާއަކީ އެގައުމަށް ދިން ހަމަލާގެ ބަދަލު ހިފުމެއް ކަމަށް ރަސްމީކޮށް އެއްވެސް ފަރާތަކުން އަންގާފައި ނުވާކަމަށެވެ. "ލަންކާގެ ހަމަލާއާއި ގުޅިގެން އަދި އެއްވެސް އިންޓެލް ރިޕޯޓެއް އައިސްފައި ނުވޭ. ސްރީލަންކާގައި އަދި ތަހުގީގު ދަނީ ކުރިއަށް. އެހެންކަމުން އަދި އެއަށް އެއްޗެއް ބުނުން މާ އަވަސް. " އޭނާ ވިދާޅުވިއެވެ.
ލަންކާއަށް ދިން މި ހަމަލާއަކީ ހައްދު ފަހަނައަޅާފައިވާ މުސްލިމް ޖަމާއަތެއް ކަމަށްވާ ތައުފީތް ޖަމާއަތު ގުރޫޕުން ދިން ހަމަލާއެއް ކަމަށް މިހާތަނަށް ކުރި ތަހުގީގު ތަކުން އެެނގިފައިވާ ކަމަށް ލަންކާގެ ސަރުކާރުން ބުނެއެވެ.
