ޕްރިމިއާ ލީގުގައި ވެސްޓް ހޭމް ޔުނައިޓެޑް ބަލިކޮށް މެންޗެސްޓާ ޔުނައިޓެޑު ޕޮއިންޓް ތާވަލުގެ ފަސްވަނައަށް ޖެހިލައިފިއެވެ.
ހޮނިހިރު ދުވަހުގެ ރޭ ކުޅުނު މެޗު ވެސްޓް ހޭމްއާ ވާދަކޮށް ޔުނައިޓެޑުން މެޗު ކާމިޔާބުކުރީ 1-2 ގެ ނަތީޖާއަކުންނެވެ.
ޔުނައިޓެޑު ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުންދިޔައީ އެޓީމުންނެވެ. ނަމަވެސް ވެސްޓް ހޭމްއިން ވަނީ ޔުނައިޓެޑުގެ ހާފަށް ބާރުބޮޑުކޮށް ހަމަލާ އުފައްދަން މަސައްކަތް ކޮށްފައެވެ.
މެޗުގައި ފުރަތަމަ ލަނޑު ޖަހާ ލީޑު ނެގީ ޔުނައިޓެޑުންނެވެ. މި ލަނޑު 19 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކުރީ ޕައުލް ޕޮގްބާއެވެ.
މި ލަނޑަށްފަހުވެސް ޔުނައިޓެޑަށް ވަނީ ލީޑު ފުޅާކުރުމަށް ފުރުސަތުތަކެއް ލިބި ބޭކާރުވެފައެވެ. އެގޮތުން ރޮމެލޫ ލުކާކޫއަށް ލިބުނު ހުސް ފުރުސަތުތައް ހިމެނެއެވެ.
@PaulPogba has been getting plenty of air time in 2019... pic.twitter.com/rKB3h3Y9QQ
— Manchester United (@ManUtd) April 13, 2019
ދެވަނަ ހާފް ފެށިގެން ހަތަރުވަނަ މިނެޓުގައި ވެސްޓް ހޭމްއިން ވަނީ ނަތީޖާ ހަމަހަމަކޮށްފައެވެ. މި ލަނޑު ލަންޒިނީގެ އެހީތެރިކަމާއެކު ކާމިޔާބުކުރީ ފިލިޕޭ އެންޑަސަންއެވެ.
ޔުނައިޓެޑުން މެޗުގެ ލީޑު އަނބުރާ ހޯދީ 80 ވަނަ މިނެޓުގައެވެ. މި ލަނޑުވެސް އެޓީމަށް ލިބުނު ޕެނަލްޓީއަކުން ކާމިޔާބުކުރީ ޕޮގްބާއެވެ. މިއީ މި ސީޒަނުގެ ޕްރިމިއާ ލީގުގައި ޕޮގްބާ ކާމިޔާބުކުރި 13 ވަނަ ލަނޑެވެ.
މި ނަތީޖާއާއެކު ޔުނައިޓެޑު އޮތީ ކުޅުނު 33 މެޗުން ލިބުނު 64 ޕޮއިންޓާއެކު ޕޮއިންޓް ތާވަލުގެ ފަސްވަނައިގައެވެ. މެޗުން ބަލިވި ވެސްޓް ހޭމް އޮތީ ކުޅުނު 33 މެޗުން ލިބުނު 42 ޕޮއިންޓާއެކު ޕޮއިންޓް ތާވަލުގެ 11 ވަނައިގައެވެ.
