ރަސްމީ ދަތުރުފުޅެއްގައި މިނިސްޓަރ އޮފް ފޮރިން އެފެއާޒް އަބްދުﷲ ޝާހިދު ޖަރުމަނު ވިލާތަށް ފުރާ ވަޑައިގެންފިއެވެ.
ފޮރިން މިނިސްޓްރީން ހޯމަ ދުވަހު ކުރައްވާފައިވާ ޓްވީޓެއްގައި ވިދާޅުވީ ޝާހިދު ޖަރުމަނަށް ވަޑައިގެންނެވީ އެ ޤައުމުގައި ބޭއްވުމަށް ހަމަޖެހިފައިވާ ފަސް ވަނަ ބާރލިން އެނާޖީ ޓްރާންސިޝަން ޑައިލޮގުގައި ބައިވެރިވެ ވަޑައިގަތުމަށް ކަމަށެވެ.
މި ޑައިލޮގަކީ ތިމާވެއްޓާ އެކުވެރި ހަކަތަ އުފެއްދުމަށާއި ހެޔޮ އަގުގައި ހަކަތަ އުފެއްދުމަށް ކުރެވިދާނެ މަސައްކަތްތަކާ ގުޅޭ ގޮތުން މަޝްވަރާކުރުމަށް ބާއްވާ ބައްދަލުވުމެއް ކަމަށް އެ މިނިސްޓްރީން މައުލޫމާތު ދެއެވެ
ތިމާވެއްޓާ އެކުވެރި ހަކަތަ އުފައްދާ ސިސްޓަމްތައް ޤާއިމުކުރުމާ ގުޅޭ ގޮތުން މަޝްވަރާ ކުރުމަށް ބާއްވާ ބައްދަލުވުން ކުރިއަށް ގެންދަން ހަމަޖެހިފައި ވަނީ އޭޕްރީލް 9 އަދި 10 ވަނަ ދުވަހުއެވެ.
މިނިސްޓަރު ޝާހިދުގެ ދަތުރުފުޅުގައި ޖަރުމަނުގެ ފެޑެރަލް މިނިސްޓަރ އޮފް ފޮރިން އެފެއާޒާ ބައްދަލު ކުރައްވާނެ ކަމަށާއި ދެ ޤައުމުގެ ދެމެދު އޮތް ބައިލެޓަރަލް ގުޅުން ވަރުގަދަކުރުމާ ގުޅޭ ގޮތުން ދެ ބޭފުޅުންގެ މެދުގައި މަޝްވަރާކުރައްވާނެ ކަމަށް ފޮރިން މިނިސްޓްރީން ބުނެއެވެ.
