ފ އަތޮޅުގައި ބޮޑު ޕްރޮޖެކްޓް ހިންގިޔަސް އެއަތޮޅު ރައްޔިތުން އެއަތޮޅުގައި ދިރިއުޅޭނެ ކަމަށް ޕީޕީއެމްގެ ރައީސް ޔާމީން ފެކްޝަންގެ ސެކްރެޓަރީ ޖެނެރަލް އަދި ފ ނިލަންދޫ ދާއިރާގެ މެންބަރު ޑރ އަބްދުﷲ ޚަލީލް ވިދާޅުވެއްޖެއެވެ.

ޑރ ޚަލީލް މިހެން ވިދާޅުވެފައި މިވަނީ ސައުދީ އަރަބިއްޔާއަށް ފ އަތޮޅު ވިއްކާލަން އުޅޭކަމުގެ އަޑުތައް ފެތުރި އެކަމާ ގުޅޭގޮތުން ރައްޔިތުންގެ ކަންބޮޑުވުން އިންތިހާއަށް ގޮސްފައިވާ ދަނޑިވަޅެއްގައެވެ.

އެކަންކަމަށް އިޝާރާތް ކުރައްވާ ޑރ ޚަލީލް ފޭސްބުކްގައި ވިދާޅުވެފައިވަނީ ފ އަތޮޅަށް އަމާޒުވެފައި އޮތީ ރާއްޖެ ދުވަހަކުވެސް ނުދެކޭ ފަދަ ބޮޑު ޕްރޮޖެކްޓެއް ކަމަށެވެ. އެޕްރޮޖެކްޓް ތަންފީޒް ވިޔަސް، މިހާރެކޭ އެއްގޮތައް ފ.އަތޮޅު އޮންނާނީ ރާއްޖޭގެ ސިޔާދަތުގެ ދަށުގައި ކަމަށާއި ހިނގާނީ ރާއްޖޭގެ ޤާނޫންތައް ކަމަށެވެ. އަދި އޮންނާނީ ރާއްޖޭގެ ވެރިކަމުގެ ދަށުގައި ރާއްޖޭގެ ބައެއްގެ ގޮތުގައި ކަމަށްވެސް ޚަލީލް ވިދާޅުވެފައިވެއެވެ.

ޚަލީލް ވިދާޅުވެފައިވަނީ ފ އަތޮޅުގެ ރައްޔިތުން އުފާވެރިކަމާ ހިތްހަމަޖެހުމުގައި ފ އަތޮޅުގައި ދިރިއުޅޭނެ ކަމަށެވެ.

ޚަލީލް ވިދާޅުވީ ވެރިކަމަށް ދަހިވެތިވާ ހަސަދަވެރިން މިފަދަ ކަންކަން މިޤައުމަށް އައުމަށް ނޭދޭނެ ކަމަށެވެ.

ޚަލީލް މިހެން ވިދާޅުވެފައިވާއިރު ވ އަތޮޅާއި ފ އަތޮޅު ޒުވާނުން ހުޅުމާލެއަށް ބަދަލުވުމަށް ގޮވާލައްވަމުން ރައީސުލް ޖުމްހޫރިއްޔާ ޢަބްދުﷲ ޔާމީން ވިދާޅުވެފައިވަނީ އިޤްތިސޯދީ ސްކޯޕެއް ނެތް ރަށްރަށުގައި ކުރިއެރުމެއް ނެތްކަމަށާއި ފަހަރުގައި ހިތްގައިމު ރަށަކަށް ވެދާނެ ކަމަށެވެ. އެހެންނަމަވެސް، ދުއިސައްތަ މީހުން، ތިންސަތޭކަ މީހުން، ހަތަރު ސަތޭކަ މީހުންގެ އާބާދީގައި ކޮށްދެވޭނެ މާބޮޑެތި، ނޫނިއްޔާ ހާސިލް ކޮށްދެވޭނެ މާބޮޑެތި ކަންތައްތަކެއް ނުހުންނާނެ ކަމަށް ރައީސް ޔާމީން ވިދާޅުވިއެވެ.

ފ އަތޮޅު ވިއްކާލުމުގެ ވާހަކަ ދެކެވެމުންދާއިރު އެކަމާ ގުޅޭގޮތުން ރަސްމީ ސިފައެއްގައި ސަރުކާރުން ތަފްސީލު މައުލޫމާތެއް އަދި ދެއްވާފައެއް ނުވެއެވެ.