މޯލްޑިވްސް ޗެސް އެސޯސިއޭޝަނުން އިންތިޒާމު ކޮށްގެން ބާއްވާ ހަތަރުވަނަ އިންޓަ ސްކޫލް ޗެސް ޗެމްޕިއަންޝިޕްގެ މީޑިއާ ޕާޓްނަރަކަށް ރާއްޖެ ޓީވީ ހަމަޖައްސައި، އެއްބަސްވުމުގައި ސޮއިކޮށްފިއެވެ.
މި އެއްބަސްވުމުގައި ޗެސް އެސޯސިއޭޝަންގެ ފަރާތުން ރައީސް ހުސެއިން ޝިޔާން ސޮއިކުރެއްވި އިރު، ރާއްޖެ ޓީވީގެ ފަރާތުން ސޮއިކުރެއްވީ އެގްޒެކެޓިވް ޑައިރެކްޓަރ ނާޒްމީ ސައީދުއެވެ.
އެއްބަސްވުމުގައި ސޮއިކުރެއްވުމަށް ފަހު ޝިޔާން ވިދާޅުވީ، އިންޓަ ސްކޫލް ޗެސް ޗެމްޕިއަންޝިޕްގެ މީޑިއާ ޕާޓްނަރަކަށް ރާއްޖެ ޓީވީ ހަމަޖެއްސީ ރާއްޖެ ޓީވީއަކީ މީޑިއާ ކަވަރޭޖް މުޅި ރާއްޖޭގައި ވެސް އެންމެ ފުޅާކޮށް ގެނެސްދޭ ޓީވީ ކަމަށްވާތީ ކަމަށެވެ.
ނާޒްމީ ވިދާޅުވީ، އިންޓަ ސްކޫލް ޗެސް ޗެމްޕިއަންޝިޕްގެ މީޑިއާ ޕާޓްނަރަކަށް ރާއްޖެޓީވީ އިހުތިޔާރު ކުރި ކަމަށްޓަކާ ޗެސް އެސޯސިއޭޝަނަށް ޝުކުރު އަދާކުރާ ކަމަށާއި، މި މުބާރާތުގެ ކަވަރޭޖް ރާއްޖެ ޓީވީން ވަރަށް ފުރިހަމަކޮށް ގެނެސްދޭނެ ކަމަށެވެ.
މިފަހަރުގެ އިންޓަ ސްކޫލް ޗެސް މުބާރާތަކީ މޯލްޑިވްސް ޗެސް އެސޯސިއޭޝަން ވުޖޫދަށް އައިސް ބާއްވާ ފުރަތަމަ އިންޓަ ސްކޫލް މުބާރާތެވެ. މީގެކުރިން އިންޓަ ސްކޫލް ޗެސް މުބާރާތް ބާއްވާފައިވަނީ ޗެސް ފެޑެރޭޝަނުންނެވެ.
މިފަހަރުގެ މުބާރާތުގައި ޖުމްލަ 14 ސްކޫލަކުން ވާދަކުރެއެވެ. އޭގެ ތެރޭގައި ހިމެނެނީ މާލެއިން 11 ސްކޫލަކާއި، ހުޅުމާލެއިން ތިން ސްކޫލެކެވެ.
