ސްޕެނިޝް ލަލީގާއަށް އެނބުރި އަންނަން ބޭނުންވާ ކަމަށް ޕޯޓޯއަށް ކުޅެމުން އަންނަ ސްޕެއިންގެ ކުރީގެ ކެޕްޓަން އީކާ ކަސިޔަސް ބުނެފިއެވެ.

ނޫސްވެރިންނަށް މައުލޫމާތު ދެމުން އުމުރުން 37 އަހަރުގެ ކަސިޔަސް ބުނީ، ލަލީގާގެ ޓީމުތަކާ ދެކޮޅަށް ކުޅެން ފުރުސަތު ލިބުމަކީ ލިބޭ ބޮޑު ނަސީބެއް ކަމަށާއި، އަނބުރާ ލަލީގާއަށް ދާން ބޭނުންވާ ކަމަށެވެ.

ކަސިޔަސް މިހެން ބުނެފައިވާއިރު، އޭނާ ހޯދުމަށް ސްޕެއިންގެ ގިނަ ކްލަބްތަކުން އަންނަނީ މަސައްކަތް ކުރަމުން ކަމަށް ރިޕޯޓްތައް ބުނެއެވެ. އޭގެ ތެރޭގައި ސެވިއްޔާ ހިމެނެއެވެ.

ރެއާލް މެޑްރިޑަށް ކުރިން ކުޅުނު ކަސިޔަސް ބުނީ ރެއާލްއާއެކު ހޭދަކުރި ކާމިޔާބު ސީޒަންތައް ތަކުރާރުކުރުމަކީ ފަސޭހަކަމެއް ނޫން ކަމަށާއި، އެއީ މާޒީ ކަމަށެވެ.

ގައުމީ ޓީމުގެ ދޮރު ބަންދުވިކަން ގަބޫލުނުކުރާކަން ފާހަގަކުރަމުން ކަސިޔަސް ބުނީ، އެހެން ކުޅުންތެރިން ގޮތަށް އަދިވެސް ގައުމީ ޓީމުން ރިޓަޔާކުރަން އަދި ނުވިސްނާ ކަމަށެވެ.

ރެއާލް މެޑްރިޑުން ކެރިޔަރު ފެށި ކަސިޔަސް ވަނީ އެ ކްލަބަށް 725 މެޗު ކުޅެ، ގިނަ ކާމިޔާބީތަކެއްގެ އިތުރުން ގިނަ ރެކޯޑުތަކެއްވެސް ހަދާފައެވެ.

ރެއާލްއާއެކު ހޭދަކުރި 15 ސީޒަނުގައި އެ ކްލަބާއެކު ކަސިޔަސް ވަނީ ފަސް ލީގު ތަށި، ދެ ކޮޕާޑެލްރޭ، ހަތަރު ސްޕެނިޝް ސުޕަކަޕް، ތިން ޔުއެފާ ޗެމްޕިއަންސް ލީގު، ދެ ޔުއެފާ ސުޕަކަޕް އަދި އެއް ފީފާ ކްލަބް ވޯލްޑް ކަޕް ކާމިޔާބުކޮށްފައެވެ.

ޕޯޓޯއަށް 2015 ވަނަ އަހަރުގެ ސީޒަނުގައި ބަދަލުވެ ކަސިޔަސް ވަނީ މިހާތަނަށް އެޓީމަށް 149 މެޗު ކުޅެފައެވެ. އޭނާ ވަނީ އެ ކްލަބާއެކު ލީގު ތަށިވެސް އެއް ފަހަރު ކާމިޔާބުކޮށްފައެވެ.

ސްޕެއިން ގައުމީ ޓީމާއެކު ފީފާ ވޯލްޑް ކަޕް ކާމިޔާބުކޮށްފައިވާ ކަސިޔަސް ވަނީ ދެ ޔޫރޯވެސް އެޓީމާއެކު ކާމިޔާބުކޮށްފައެވެ. އޭނާ ވަނީ ގައުމީ ޓީމަށް 167 މެޗު ކުޅެފައެވެ.