އަލުން އަނބުރާ ޖަލަށް ދާންޖެހުނު ނަމަވެސް، ރާއްޖެ ވަޑައިގަންނަވާނޭ ކަމަށް ކުރީގެ ރައީސް މުހައްމަދު ނަޝީދު އަނެއްކާ ވެސް ވިދާޅުވެއްޖެ އެވެ.

ނަޝީދު މިހެން ވިދާޅުވީ ޖެނީވާ ސަމިޓް ފޯ ހިއުމަން ރައިޓްސްގެ ނުވަ ވަނަ ބައްދަލުވުން ހުޅުވާދެއްވަމުން ދެއްކެވި ވާހަކަފުޅުގަ އެވެ.

ކުރީގެ ރައީސް ނަޝީދު ވިދާޅުވީ ޑިމޮކްރަސީ ގެނައުމަށް އެމަނިކުފާނު ކުރި މަސައްކަތްތަކަކީ ވަރަށް އުނދަގޫ މަސައްކަތެއް ކަމަށާއި އެމަނިކުފާނު މަސައްކަތް ކުރެއްވި ގޮތަށް މަސައްކަތް ކުރުމަށް އެހެން މީހުންނަށް ނަސޭހަތް ނުދެއްވާނޭ ކަމަށެވެ. ނަޝީދު ވިދާޅުވީ 2013 ވަނަ އަހަރުގެ ރިޔާސީ އިންތިހާބުން އެމަނިކުފާނު ބަލިކުރެވެންދެން އޭރުގެ ސަރުކާރުން އިންތިހާބު ބޭއްވި ކަމަށެވެ.

އޭނާ ވިދާޅުވީ، ދުނިޔޭގެ ބައެއް ގައުމުތަކުގެ ވެރިންނަކީ، މަކަރާއި ވައްކަމާއި މީހުން މަރަން ތާއީދުކޮށް، އަމަލީކޮށް އެކަން ކުރަމުންދާ ބައެއް ކަމަށެވެ. އެފަދަ ވެރިންނާއި ދެކޮޅަށް ދުނިޔޭގެ ހުރިހާ ގައުމުތަކުން ގުޅިގެން މަސައްކަތްކުރުމަށް ވެސް ނަޝީދު ވަނީ ގޮވާލާފަ އެވެ. އަދި، އެކަމަށް ބޭނުންވަނީ އިގްތިސާދީ، އިޖްތިމާއީ އަދި ސިޔާސީ ގަވާއިދުތަކެއް ކަމަށް ވެސް ނަޝީދު ވިދާޅުވި އެވެ.

ރައީސް މުހައްމަދު ނަޝީދު މި ސަމިޓްގައި ބައިވެރިވެ ވަޑައިގަންނަވަނީ ޝަރަފުވެރި މެހުމާނުގެ ގޮތުގަ އެވެ.

ދިގު މުއްދަތެއްގެ ޖަލު ހުކުމެއްގައި ހުންނެވި ކުރީގެ ރައީސް މުހައްމަދު ނަޝީދުގެ ހިތްވަރުފުޅުގަދަކަން ފާހަގަކޮށް، މި ސަމިޓުގައި އެމަނިކުފާނަށް އެވޯޑެއް ދިނުމަށް ޖެނީވާ ސަމިޓުން ވަނީ ނިންމާފަ އެވެ.

އިންސާނީ ހައްގުތަކާ ބެހޭ އދ. ގެ ކައުންސިލްގެ ރަސްމީ ބައްދަލުވުންތަކުގެ ކުރިން ޖެނީވާގައި ބާއްވާ މި ސަމިޓް އިންތިޒާމް ކުރަނީ ޔޫއެން ވޮޗު ކިޔާ ޖަމާއަތަކުންނެވެ. އިންސާނީ ހައްގުތަކާ ބެހޭ މައްސަލަތަކަށް ވާހަކަ ދައްކައި ޚިޔާލު ބަދަލުކުރަން ބާއްވާ މި ސަމިޓް އިންތިޒާމް ކުރުމުގައި ދުނިޔޭގެ އެކި ކަންކޮޅުތަކުން އިތުރު 20 ޖަމިއްޔާއެއް ބައިވެރިވެ އެވެ.

މި ސަމިޓް ނިމޭތާ ހަފްތާއެއް ފަހުން، އދ. ގެ އިންސާނީ ހައްގުތަކާ ބެހޭ ކައުންސިލް މި އަހަރަށް އިފްތިތާހު ކުރުމަށް ދުނިޔޭގެ އެކި ގައުމުތަކުގެ ފޮރިން މިނިސްޓަރުން ޖެނީވާ އަށް ވަޑައިގަންނަވާނެ އެވެ.

ޖެނީވާ ސަމިޓުގައި ކޮންމެ އަހަރަކު ވެސް ނޫސްވެރިންނާއި ގައުމުތަކުގެ ކުރީގެ ވެރިންނާއި ސިޔާސީ ގޮތުން ޖަލު ހުކުމްތައް އައިސްފައިވާ ސިޔާސީ ފަރާތްތަކުގެ އިތުރުން އިންސާނީ ހައްގުތަކުގެ މަސައްކަތުގައި ހަރަކާތްތެރިވާ އިސް ފަރާތްތައް ބައިވެރިވެ އެވެ.

މިއަހަރުގެ ސަމިޓު ހާއްސަކުރެވިފައިވާ މައުޟޫތަކަކީ، އަންހެނުންނާ މެދު ގެންގުޅޭ ތަފާތުކުރުމާއި، ނޫސްވެރިން ޖަލަށްލުމާއި، އިންޓަނެޓުގެ މިނިވަންކަމާއި، ދީނީ ގޮތުން ހައްދުފަހަނައަޅައި ދިއުމާއި، އިންސާނީ ހައްގުތަކުގެ ދިފާއުގައި މަސައްކަތްކުރާ މީހުންނަށް ކުރާ އަނިޔާތަކުގެ އިތުރުން ޖަލުތަކުގެ ހާލަތެވެ.