ސްޕެނިޝް ލަލީގާގައި ލިއޮނެލް މެސީގެ ހެޓްރިކާ އެކު ރެއާލް ބެޓިސް ބަލިކޮށް ބާސެލޯނާ އިން ޕޮއިންޓް ތާވަލުގެ އެއްވަނައިގައި 10 ޕޮއިންޓްގެ ލީޑެއް ނަގައިފިއެވެ.
އާދީއްތަ ދުވަހުގެ ރޭ ކުޅުނު މެޗު ބެޓިސްއާ ވާދަކޮށް ބާސާ އިން މެޗު ކާމިޔާބުކުރީ 1-4 ގެ ނަތީޖާއަކުންނެވެ.
ބެޓިސް ދަނޑުގައި ކުޅުނު މި މެޗު ފެށިގެން 18 ވަނަ މިނެޓުގައި ބާސާ އިން ވަނީ ލީޑު ނަގާފައެވެ. މި ލަނޑު އެ ޓީމަށް ލިބުނު ހިލޭ ޖެހުމަކުން ކާމިޔާބުކުރީ ކެޕްޓަން މެސީއެވެ.
މި ލަނޑަށް ފަހު ވެސް ބާސާގެ ފަރާތުން މޮޅު ކުޅުމެއް ފެނިގެންދިޔައިރު، އެ ޓީމުން ލީޑު ފުޅާކުރީ އިތުރު ވަގުތުގައެވެ. މި ލަނޑު ވެސް ކާމިޔާބުކުރީ މެސީއެވެ. އޭނާ މި ލަނޑު ކާމިޔާބުކުރީ ލުއިސް ސުއަރޭޒްގެ އެހީތެރިކަމާ އެކުގައެވެ.
DWWWWWWWWDDWWWWW
— FC Barcelona (@FCBarcelona) March 18, 2019
More W's than a bow-wowing chow-chow pic.twitter.com/jivxhXNvCr
ދެ ވަނަ ހާފް ފެށިގެން ވެސް ރަނގަޅަށް ކުޅެމުންދިޔައީ ބާސާއިންނެވެ. އެ ގޮތުން 63 ވަނަ މިނެޓުގައި އެ ޓީމުން ވަނީ ތިން ވަނަ ލަނޑު ޖަހާފައެވެ. މި ލަނޑު ޖެރާޑް ޕީކޭގެ އެހީތެރިކަމާ އެކު ކާމިޔާބުކުރީ ސުއަރޭޒްއެވެ.
މެޗުގައި ބެޓިސް އިން ކާމިޔާބުކުރި ހަމައެކަނި ލަނޑު 82 ވަނަ މިނެޓުގައި ކާމިޔާބުކުރީ ލޮރެން މޮރޮންއެވެ. ބާސާގެ ހަތަރު ވަނަ ލަނޑު 85 ވަނަ މިނެޓުގައި ކާމިޔާބުކުރީ އިވާން ރަކިޓިޗްގެ އެހީތެރިކަމާ އެކު މެސީއެވެ.
މި ނަތީޖާއާ އެކު ބާސާ އޮތީ ކުޅުނު 28 މެޗުން ލިބުނު 66 ޕޮއިންޓާ އެކު ޕޮއިންޓް ތާވަލުގެ އެއްވަނައިގައެވެ. މެޗުން ބަލިވި ބެޓިސް އޮތީ ކުޅުނު 28 މެޗުން ލިބުނު 39 ޕޮއިންޓާ އެކު ޕޮއިންޓް ތާވަލުގެ 8 ވަނައިގައެވެ.
