މާލޭގެ ގިނަ ސްކޫލުތަކުގައި ބައިނަލްއަގްވާމީ މާދަރީ ބަހުގެ ދުވަސް ފާހަގަކޮށްފިއެވެ.
މި ދުވަސް ފާހަގަކުރުމުގެ ގޮތުން ދިވެހި ބަހާ ގުޅޭ ތަފާތު މުބާރާތްތަކާ، ތަފާތު ކުޅިވަރުގެ އިތުުރުން ދިވެހި ބަސްތައް ދަސްކޮށްދިނުމުގެ ހަރަކާތްތަކެއް ވެސް ވަނީ ކުރިއަށް ގެންގޮސްފައެވެ.
މަޖީދިއްސާ ސްކޫލުގައި ކުރިއަށްދާ ހަރާކާތްތަކާ ގުޅޭ ގޮތުން އެ ސްކޫލު ދިވެހި ލީޑިން ޓީޗަރ، މުހައްމަދު ވަހީދު ނަޖީބު ވިދާޅުވީ، މާދަރީ ބަހުގެ ދުވަސް ފާހަގަކުރުމުގެ ގޮތުން އެންމެ ބޮޑު އިސްކަމެއް ދެނީ އިހު ޒަމާނުގައި ބޭނުންކުރި ތަކެއްޗާއި، އެތަކެތީގެ ނަމުގެ އިތުރުން އާ ބަސްތަކެއް ކުދިންނަށް ދަސްކޮށްދީ، ކިޔަވާ ކުދިންނަކީ ބަހަށް ފަރިތަ ކުދިންތަކަކަށް ހެދުމަށް ކަމަށެވެ.
މީގެ އިތުރުން މާލޭގެ ހުރިހާ ސްކޫލެއްގައި މި ދުވަސް ފާހަގަކުރުމުގެ ގޮތުން ތަފާތު ހަރަކާތްތައް ވަނީ ކުރިއަށް ގެންގޮސްފައެވެ. އެގޮތުން ބަހުސް މުބާރާތްތަކާ، ޅެން ހެދުމުގެ މުބާރާތްތަކުގެ އިތުރުން، ވާހަކަދެއްކުމުގެ މުބާރާތްތައް ބޭއްވުމަށް ވަނީ ހަމަޖެހިފައެވެ. މާދަރީބަހުގެ ދުވަސް ފާހަގަކުރުމުގެ ގޮތުން ބައެއް ސުކޫލުތަކަށް މިއަދު ކުދިން ދިޔައީ ދިވެހި ހެދުމުގައެވެ.
ކޮންމެ އަހަރެއްގެ ވެސް ފެބްރުއަރީ 21 އަކީ ބައިނަލްއަގްވާމީ މާދަރީ ބަހުގެ ދުވަހުގެ ގޮތުގައި ފާހަގަކުރާ ދުވަސް ކަމަށް ވާއިރު މި އަހަރުގެ ޝިއާރަކީ "ގިނަ ބައްސަ ތައުލީމުގެ ވަސީލަތުން ދެމެހެއްޓެނިވި މުސްތަގްބަލުތަކަށް" އެވެ. މިއީ ބައިނަލްއަގްވާމީ މާދަރީ ދުވަސް ފާހަގަކުރާ 17 ވަނަ އަހަރެވެ.
