ނިއުޒިލެންޑްގައި މުސްލިމުންނަށް އަމާޒުކޮށް ދިން ޓެރަރިސްޓް ހަމަލާތަކާ ގުޅިގެން އެ ގައުމުގެ ބަޑި ގެންގުޅުމުގެ ގަވާއިދުތައް މުރާޖާ ކުރައްވާނެ ކަމަށް ބޮޑުވަޒީރު ޖެސިންޑާ އަރޑެން ވިދާޅުވެއްޖެއެވެ.

ކްރައިސްޗާޗްގައި ދިން ހަމަލާތަކާ ގުޅިގެން ބޭއްވި ހާއްސަ ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ޖެސިންޑާ ވިދާޅުވީ މިހާރު އެ ގައުމުގައި ހެދިފައިވާ ބަޑި ގެންގުޅުމުގެ ގަވާއިދުތައް ބަދަލުކުރަން ޖެހޭ ވަގުތު އައިސް ޖެހިއްޖެ ކަމަށެވެ. މީގެ ކުރިން ވެސް އެތައް ފަހަރަކު އެ ގަވާއިދު އިސްލާހު ކުރަން މަސައްކަތް ކޮށް ނާކާމިޔާބުވީ ކަމުގައިވީ ނަމަވެސް މިހާރު އެކަން އިތުރަށް ފަސްކުރެވެން ނެތް ކަމަށް އެކަމަނާ ވިދާޅުވިއެވެ.

މި ހަމަލާތައް ދިން މީހާ އަތުގައި ބަޑި ގެންގުޅުމުގެ ހުއްދަ އޮތް ކަމަށް ވެސް ޖެސިންޑާ ހާމަކުރެއްވިއެވެ. އެއީ އޭނާ 2017 ވަނަ އަހަރުގެ ނޮވެމްބަރު މަހުގެ ތެރޭގައި ނެގި ހުއްދައެއް ކަމަށް ވެސް އެކަމަނާ ވިދާޅުވިއެވެ.

ހަމަލާތަކާއި ގުޅިގެން ހައްޔަރު ކުރެވުނު އެކަކު ވަނީ ކޯޓަށް ހާޒިރުކޮށް ބަންދުގައި ބަހައްޓަން އަމުރުކޮށްފައެވެ. ނަމަވެސް އޭނާގެ މޫނު ދެއްކުން، ކޯޓު އަމުރެއްގެ ދަށުން ވަނީ މަނާކޮށްފައެވެ. މޫނު ދެއްކުން މަނާކުރި ކަމުގައިވީ ނަމަވެސް މީޑިއާތަކުން ވަނީ އޭނާއަކީ ހަމަލާތައް ލައިވް ސްޓްރީމް ކުރި ވީީޑިއޯތަކުން ފެންނަ ބްރެންޓަން ޓަރަންޓް ކަން ކަށަވަރު ކޮށްދީފައެވެ. ދެން އޭނާ ކޯޓަށް ހާޒިރުކުރަން ނިންމާފައި ވަނީ އެޕްރިލް މަހުގެ 5ވަނަ ދުވަހުއެވެ. 

އިތުރު މީހަކު ހަމަލާތަކާ ގުޅިގެން ހައްޔަރު ކުރެވިފައިވާ އިރު، އޭނާގެ މައްޗަށް ވަނީ މީހުން މެރުމާއި، ޓެރަރިސްޓް ހަމަލާއެއްގައި ބައިވެރިވުމުގެ ދައުވާ އުފުލާފައެވެ. މައުލޫމާތު ލިބިފައިވާ ގޮތުގައި ދެން ހައްޔަރުކޮށްފައި ވަނީ އުމުރުން އެއްމެ 18 އަހަރުގެ ޑެނިއަލް ޖޯން ބަރާ ކިޔާ ނިއުޒިލެންޑްގެ ރައްޔިތެކެވެ.

ކްރައިސްޗާޗުގެ ދެ މިސްކިތެއްގައި ދިން ޓެރަރިސްޓް ހަމަލާތަކުގައި މިހާތަނަށް 49 މީހަކު މަރުވެފައިވާ ކަމަށް މައުލޫމާތު ލިބިފައިވާ އިރު، 40 އަށް ވުރެ ގިިނަ މީހަކަށް ދަނީ އެކިވަރުގެ ޒަހަމްތަކާއި ގުޅިގެން ހޮސްޕިޓަލުގައި ފަރުވާ ދެމުންނެވެ. ހަމަލާގައި މަރުވީ މީހުންގެ ތެރޭގައި ކުޑަކުދިންނާއި އަންހެނުން ވެސް ހިމެނެއެވެ.