ފުރަތަމަ ފަހަރަށް އިނގިރޭސިވިލާތުގެ އަންހެން ފުޓުބޯޅަ ޓީމަށް ހާއްސަ ޖާރޒީ ކިޓެއް ހަދައިފިއެވެ.
ޖޫން ހަތެއްގައި ފްރާންސްގައި އޮންނަ ފުޓުބޯޅަ އަންހެން ވޯލްޑްކަޕުގައި އިނގިރޭސިވިލާތުގެ ޓީމް ލުމަށް ފިރިހެން ޓީމާއި ތަފާތު ޖާރޒީ ކިޓެއް މިހާރު ވަނީ ފަރުމާ ކޮށްފައެވެ.
މެންޗެސްޓާ ސިޓީގެ އެކަޑަމީ ސްޓޭޑިއަމްގައި އޭޕްރިލް ފަސްވަނަ ދުވަހު ކެނެޑާއާ ދެކޮޅަށް އިނގިރޭސިވިލާތް ނުކުންނައިރު ޓީމް ލާނީ އެ ޓީމަށް ހާއްސަ ޖާރޒީއެކެވެ.
ޕްލާސްޓިކް ފުޅި ރިސައިކަލް ކޮށްގެން ހަދާފައިވާ މި ޖާރޒީގައި ފަރިތަކުރުންތަކުގެ މެޗުތަކެއް އިނގިރޭސި ވިލާތުން، ސްޕެއިން އާއި ނިއުޒިލެންޑް އަދި ޑެންމާރކްއާ ދެކޮޅަށް ވެސް ކުޅޭނެއެވެ.
އިނގިރޭސިވިލާތުގެ ޓީމުގެ ފޯވާރޑް ފްރެން ކަރބައި ބުނީ، އަންހެން ޓީމަށް ހާއްސަކޮށްގެން ޖާރޒީ ކިޓެއް ހެދުމުން އެކަމާ އުފާ ކުރާ ކަމަށެވެ.
މި ފަހަރުގެ އަންހެން ވޯރލްޑް ކަޕުގައި އިނގިރޭސި ވިލާތުގެ ރަސްމީ ޖާރޒީ ކުލައަކީ ހުދެވެ.
އަންހެން ފުޓުބޯޅަ އެސޯސިއޭޝަނުގެ ޑިރެކްޓަރ ބެރޯނެސް ސޫ ކެމްޕަބެލް ވިދާޅުވީ، އަންހެން ޓީމަށް ހާއްސަކޮށްގެން ޖާރޒީ ކިޓެއް ހެދި މިއީ ފުރަތަމަ ފަހަރު ކަމަށާއި، މިހެން މިކަން ކުރުމުން އަންހެން ފުޓުބޯޅަ ގައުމުގައި އާލާވެފައިވާ މިންވަރު ދޭހަވާ ކަމަށެވެ.
ޖޫން މަހު އޮންނަ ވޯލްޑްކަޕްގައި އިނގިރޭސިވިލާތް އޮތީ ސްކޮޓްލޭންޑް، އާރޖެންޓީނާ އަދި ޖަޕާނާ އެއް ގްރޫޕެއްގައެވެ.
