އިޓާލިއަން ލީގުގައި ކަގްލިއާރީ އަތުން ބަލިވެ އިންޓަ މިލާނަށް ހުރަސްތަކާ ކުރިމަތިލާން ޖެހިއްޖެއެވެ.

ހުކުރު ދުވަހުގެ ރޭ ކުޅުނު މެޗުން އިންޓަ ބަލިވީ ކަގްލިއާރީއާ ވާދަކޮށް 1-2 ގެ ނަތީޖާއަކުންނެވެ.

ކަގްލިއާރީ ދަނޑުގައި ކުޅުނު މި މެޗު ފެށިގެން ރަނގަޅަށް ކުޅެމުންދިޔައީ އެޓީމުންނެވެ. އެގޮތުން އެޓީމުން ވަނީ އިންޓަގެ ހާފަށް ބާރުބޮޑުކޮށް ލަނޑު ޖެހުމަށް ގިނަ ފުރުސަތުތަކެއްވެސް ތަނަވަސްކޮށްފައެވެ.

މެޗުގައި ފުރަތަމަ ލަނޑު ޖަހާ ލީޑު ނެގީ ވެސް ކަގްލިއާރީންނެވެ. މި ލަނޑު 31 ވަނަ މިނެޓުގައި އެޓީމަށް ކާމިޔާބުކޮށްދިނީ ސެޕިޓެލީއެވެ. މި ލަނޑަށްފަހުވެސް އެޓީމަށް ވަނީ ލީޑު ފުޅާކުރަން ގިނަ ފުރުސަތުތަކެއް ލިބިފައެވެ.

ކަގްލިއާރީން ރަނގަޅަށް ކުޅެމުންދަނިކޮށް 38 ވަނަ މިނެޓުގައި އިންޓައިން ވަނީ ނަތީޖާ ހަމަހަމަ ކޮށްފައެވެ. މި ލަނޑު ނައިގޮލަންގެ އެހީތެރިކަމާއެކު ކާމިޔާބުކުރީ ލައުޓާރޯ މާޓިނޭޒްއެވެ.

ނަމަވެސް ކަގްލިއަރީން ވަނީ އެޓީމުގެ ކުޅުން އިތުރަށް ވަރުގަދަކޮށް، ފުރަތަމަ ހާފް ނިމުމުގެ ކުރިން ލީޑު އަނބުރާ ހޯދާފައެވެ. މި ލަނޑު އެޓީމަށް ކާމިޔާބުކޮށްދިނީ ޕެވޮލެޓީއެވެ.

ދެވަނަ ހާފްގައި ދެޓީމަށްވެސް ވަނީ ލަނޑު ޖެހުމަށް ގިނަ ފުރުސަތުތަކެއް ލިބިފައެވެ. ނަމަވެސް އެ ފުރުސަތުތަކުގެ ބޭނުން ދެ ޓީމަށް ވެސް އެންމެ އެދެވޭ ގޮތެއްގައި ދެވަނަ ހާފްގައި ހިފިފައެއް ނުވެއެވެ.

މެޗުގެ އިތުރުވަގުތުގެ ތެރޭގައި ކަގްލިއާރީއަށް ވަނީ ޕެނަލްޓީއެއް ލިބި ބޭކާރުވެފައެވެ. އެޓީމުގެ ބަރޭލާ ފޮނުވާލި މި ޕެނަލްޓީ ދިޔައީ ގޯލު ދަނޑިމަތިން ބޭރަށެވެ.

މިއީ 2016 ވަނަ އަހަރުގެ އޮކްޓޫބަރ މަހަށް ފަހު، އިންޓަ އަތުން ކަގްލިއާރީއަށް ލިބުނު ފުރަތަމަ މޮޅެވެ. އަދި މިއީ 2017 ވަނަ އަހަރުގެ ޑިސެމްބަރ މަހަށް ފަހު، އިޓާލިއަން ލީގުގެ މެޗެއްގެ ފުރަތަމަ ހާފްގައި އެޓީމު ދެ ލަނޑު ޖެހި ފުރަތަމަ ފަހަރު ވެސް މެއެވެ.

މި ނަތީޖާއާ އެކު އިންޓައަށް ލިބިފައިވަނީ 26 މެޗުން 47 ޕޮއިންޓެވެ. އިންޓައަށްވުރެ އެއް މެޗު މަދުން ކުޅެގެން ހަތަރުވަނައިގައި 45 ޕޮއިންޓާއެކު އޭސީ މިލާން އޮތްއިރު، ހޮނިހިރު ދުވަހުގެ ރޭ ސަސޫލޯއާ ދެކޮޅަށް ކުޅޭ މެޗުން އޭސީ މިލާން މޮޅުވެގެން އެޓީމު ތިންވަނައަށް އަރާނެވެ. އަދި އިންޓަ ހަތަރުވަނައަށް ވެއްޓޭނެއެވެ.

މެޗުން މޮޅުވި ކަގްލިއާރީ ވަނީ ކުޅުނު 26 މެޗުން 27 ޕޮއިންޓް ހަމަކޮށް، ޕޮއިންޓް ތާވަލުގެ 14 ވަނައަށް ޖެހިލާފައެވެ.