މިދިޔަ ބުރާސްފަތި ދުވަހު އދ. ހުކުރުދޫ ކައިރިއަށް ހުއިފިލަނޑާ ނެގުމަށް ޑައިވިންގ އަށް ފައިބައިގެން އުޅެނިކޮށް ގެއްލުނު ޒުވާނާ ފެނުމުގެ ފުރުސަތު އޮތީ 50 ޕަސަންޓް ކަމަށް އެމްއެންޑީއެފުން ބުނެފިއެވެ.

ހުއިފިލަނޑާ ނެގުމަށް ގޮސް އުޅެނިކޮށް ޚަބަރެއް ނުވެގެން ހޯދަމުންދަނީ ށ. ޅައިމަގު އެވަރެސްޓް، އުމުރުން 23 އަހަރުގެ އަހުމަދު ޖައިލަމެވެ.

ޖައިލަމް ހޯދުމާ ގުޅޭ ގޮތުން އާދީއްތަ ދުވަހު (މިއަދު) ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަމުން އެމްއެންޑީއެފްގެ ލެފްޓިނެންޓް ކާނަލް މުޙައްމަދު ސަލީމް ވިދާޅުވީ، ޖައިލަމް ޑައިވިންގ އަށް ފޭބީ ބޮއެންސީ ކޮންޓްރޯލް ޑިވައިސެއް (ބީސީޑީ) އަޅައިގެން ކަމަށްވާ ނަމަ ވަރަށް ދުރުން ވެސް އޭނާ ލޮކޭޓު ކުރެވޭނެ ކަމަށެވެ.

ބީސީޑީގެ އެހީގައި ގާތްގަނޑަކަށް 45 ގަޑިއިރާއި 72 ގަޑިއިރު ތެރޭގައި ސަރފޭސްކުރެވޭނެކަން ފާހަގަކުރައްވައި ސަލީމް ވިދާޅުވީ ޖައިލަމް ހޯދުމަށް މިކުރަމުންދާ އޮޕްރޭޝަން ކާމިޔާބު ނުވުމުގެ ފުރުސަތު އެބައޮތް ކަމަށެވެ.

ޖައިލަމް ގެއްލިގެން ހޯދަމުން އަންނަތާ ތިން ދުވަސްވެފައިވާއިރު، އޭނާ ހޯދުމަށްޓަކައި މިހާތަނަށް 1،000 ސްކްއަރ ނޯޓިކަލްގެ ސަރަހައްދެއް ބެލިފައިވާ ކަމަށް ސަލީމް ވިދާޅުވިއެވެ. އެ ސަރަހައްދުގެ ކަނޑު ގަދަވުމުގެ ސަބަބުން، އޭނާ ހޯދުމަށް ކުރަމުންދާ މަސައްކަތުގައި ޖޮންޖެހުންތަކެއް ކުރިމަތިވެފައިވާކަން ފާހަގަކުރެއްވިއެވެ.   

ޑައިވިން ކުރުމަކީ އެމަސައްކަތް ކުރަންވާ ގޮތް ނޫން ގޮތަކަށް ކުރެވޭ ނަމަ ވަރަށް ނުރައްކާތެރި ކަމެއް ކަމަކަށްވުމުން، ރައްކާތެރި ގޮތުގައި ޑައިވިންގ ކުރުމަށްޓަކައި ޑައިވީނާ ބެހޭ ތަމްރީނުތައް ހެދުމަށް ސަލީމްވަނީ އިލްތިމާސްކުރައްވާފައެވެ. މީގެ އިތުރުން ޖައިލަމާ ބެހޭ ގޮތުން އެއްވެސް މަޢުލޫމާތެއް ލިބިއްޖެ ނަމަ ވީއެންމެ އަވަހަށް އެމްއެންޑީއެފް ކޯސްޓުގާޑުގެ ހިލޭ ގުޅޭ ނަންބަރު 191 އާ ގުޅުމަށް އެމްއެންޑީއެފުން އިލްތިމާސްކުރެއެވެ.