ދުނިޔޭގެ އެންމެ ބޮޑު ޗޮކްލެޓީ ހޭޒަލް ނަޓް ފެކްޓްރީ ވަގުތީ ގޮތުން ބަންދުކޮށްފައިވާ ކަމަށް މީޑިއާ ރިޕޯޓްތައް ބުނެފިއެވެ.
ސީއެންއެން ބުނި ގޮތުގައި ފްރާންސްގެ ވިލާޒް-އެކަލޭސްގައި ހިންގާ ފެކްޓްރީ ވަގުތީ ގޮތުން ބަންދު ކުރީ ނަޓެއްލާގެ ކޮލިޓީގައި މައްސަލަތަކެއް ހުރިކަން ފާހަގަ ކުރެވިގެންނެވެ. މިފިޔަވަޅު އެޅީ އޭގެ ކޮލިޓީ ދަށްވި ސަބަބު ބަލައި އެކަންކަން އިތުރަށް ތަހުގީގު ކުރުމަށް ކަމަށް މައުލޫމާތު ލިބެއެވެ.
އެ ކުންފުނިން ބުނި ގޮތުގައި ފްރާންސްގެ ފެކްޓްރީ ބަންދުކުރަން ޖެހުނަސް، ބާޒާރުގައި މި ވަގުތު ވިއްކަން ހުރި ނަޓެއްލާގެ އުފެއްދުންތަކުގައި މައްސަލައެއް ނުހުންނާނެއެވެ. އެހެންވެ އެ އެއްޗެހި ގަނެގެން ބޭނުން ކުރުމުގައި އެއްވެސް މައްސަލައެއް ދިމާ ނުވާނެ ކަމަށް ވެސް ކުންފުނިން ބުނެއެވެ.
ނަޓެއްލާއަކީ ދުނިޔޭގެ ގައުމުތަކުގައި މަގްބޫލު އުފެއްދުމެކެވެ. މީގެ އެއް އަހަރެއްހާ ދުވަސް ކުރިން ފްރާންސްގައި ނަޓެއްލާގެ ޕްރޮމޯޝަނެއް ހިންގައި 70 ޕަސެންޓް ޑިސްކައުންޓްގައި ވިއްކަން ފެށުމާ އެކު އެތައް ހާސް ބަޔަކު ފިހާރަތައް ކައިރީގައި ކިޔުޖެހިފައި ވެއެވެ.
ނަޓެއްލާ އުފެއްދުމަށް ބޭނުން ކުރާ ބައެއް ބާވަތްތައް 2017 ވަނަ އަހަރު ބަދަލުވުމުން އެކަމާ ނުރުހުން ފާޅުކޮށް ސޯޝަލް މީޑިއާގައި ޝުއޫރު ފާޅުކޮށްފައި ވެއެވެ.
ނަޓެއްލާ ފެކްޓްރީ އަލުން ހުޅުވާނެ ތާރީހެއް އިއުލާންކޮށްފައެއް ނުވެއެވެ.
