ވިލިނގިލީގައި އުތުރު ފަރާތު، އޮޑިހަރުގެއެއްގެ ތެރޭގައި މަރުވެފައި އޮއްވާ މިއަދު ހެނދުނު ފެނުނު އައްޑޫ ސިޓީ ހިތަދޫ ހުސައިން ސިމާދުގެ ހަށިގަނޑު ފެނުނީ ހަރުގެ ބަލަހައްޓާ މީހާއަށެވެ. އޭނާގެ ހަށިގަނޑު ވިލިނގިލީ ފެނަކައިގައި ވެސް މަސައްކަތް ކުރާ ސައީދު ހަސަނަށް ފެނުމާ އެކު، ޕޮލިސް ސްޓޭޝަނަށް ގޮސް އެކަން ރިޕޯޓް ކުރި ކަމަށް އޭނާ ބުންޏެވެ. މީހުން ދިރިއުޅޭ ސަރަހައްދާ ދުރުގައި ހުންނަ ހަރުގެއިން ސައިކަލުގައި ފުލުހުންގެ ސްޓޭޝަނަށް ގޮސް، އެ ވާހަކަ ކިޔައިދިނީ ފޯނު އަތުގައި ނެތުމުން ކަމަށް ސައީދު ބުންޏެވެ.

"އަޅުގަނޑަށް ފެނުނީ އޭނާގެ ހަށިގަނޑު. ހަރަކާތް ހުއްޓިފައި އޮތީ. އެ ވަގުތު އަޅުގަނޑުގެ އަތުގައި ފޯނު ނެތުމުން ސައިކަލުގައި ގޮސް ފުލުސް ސްޓޭޝަނަށް ވަދެ، އެންގީ،" ސައީދު ބުންޏެވެ.

ފުލުހުންގެ އޭނާގެ ހަށިގަނޑު ގއ. އަތޮޅު ހޮސްޕިޓަލަށް ގެންގޮސް ފޮރެންސިކް ތަހުގީގުތައް ދަނީ ފުރިހަމަ ކުރަމުންނެވެ. ފުލުހުން ބުނީ އޭނާ ފެނިފައި ވަނީ ޒަހަމްތަކަކާ އެކުގައި ކަމަށާއި މިހާތަނަށް ބެލި ބެލުމުން ހަށިގަނޑު ފިހިފައި ހުރި ކަމުގެ ނިޝާންތައް ހުރި ކަމަށެވެ. އެ ޒަހަމްތަކަކީ ތޫނު އެއްޗަކުން ދީފައިވާ ޒަހަމްތަކެއް ކަމަށް ނުބެލެވޭ ކަމަށް ފުލުހުން ބުންޏެވެ.

އޭނާގެ ހަށިގަނޑަށް ލިބިފައިވާ ޒަހަމްތައް ބެލި، އާއިލާއަށް ވަނީ ދައްކާފައެވެ. އޭނާގެ ހަށިގަނޑު ބެލި އަންވަރު މޫސާ "ރާއްޖެއެމްވީ"އަށް ބުނީ ހަށިގަނޑުން ފެންނަން ހުރި ޒަހަމްތަކުން އެނގޭ ގޮތުގައި އޭނާ އޮތީ މަރާލާފައި ކަމަށެވެ.

"އަޅުގަނޑަށް ވަރަށް ބޮޑަށް ބެލެވޭ މިއީ މާޑާއެއް ކަމަށް. ލޮލަށް ވެސް އެއްޗެއް ވަދެފައި ހުރި. ވަރަށް ބޮޑަށް ތަންތަނުގައި ޖަހާފައިވާ ކަމަށް ވެސް މައުލޫމާތު ލިބޭ. އަދި ހަށިގަނޑުގެ ހަރުން ފެށިގެން ތިރިއަށް ވާގަޑަކުން ބަނދެ، ހަށިގަނޑުގެ ހަންގަނޑު ނޮޅާލާފައި ވަނީ،" ސިމާދުގެ އާއިލާގެ ފަރާތުން އަންވަރު ބުންޏެވެ.

ސިމާދަކީ ކުށުގެ ރެކޯޑު އޮންނަ މީހެކެވެ. އެގޮތުން މަސްތުވާތަކެއްޗާއި ވައްކަމުގެ ތުހުމަތު އޭނާގެ މައްޗަށް ކުރެއެވެ. އެގޮތުން މިދިޔަ އަހަރުގެ ނޮވެމްބަރު މަހު ވިލިނގިލީ ބޭންކް ފަޅާލައި، 14 މިލިއަން ރުފިޔާ ވަގަށް ނެގި މައްސަލާގައި ހައްޔަރު ކުރި 11 މީހުންގެ ތެރޭގައި ސިމާދު ހިމެނެއެވެ. ފަހުން އޭނާ ދޫކޮށްލި ސަބަބެއް ފުލުހުން ނުބުނެއެވެ.

ސިމާދުގެ މަރާ ގުޅިގެން ރަށު ތެރޭގައި ދެކެވޭ ވާހަކައަކީ އޭނާ މަރާލީ ބޭންކުގެ ފަޅާލި މައްސަލައާ ގުޅިގެން، ކަންތައްތަކެއް ފޮރުވުމަށް ބަޔަކު ދުރާލައި ރާވައިގެން ކަމަށެވެ. އެގޮތުން އެކަންކޮށްފައި ވަނީ ޕްލޭންކޮށްގެން ކަމަށް ބެލެވޭ ކަމަށެވެ. ވިލިނގިލީ މީހަކާ އިނދެގެން، ކުއްޖަކު ވެސް ލިބިފައިވާ ސިމާދު މަރާލީ ގްރޫޕަކުން ކަމަށް ވެސް ބައެއް މީހުން ބުނެއެވެ.

ސިމާދުގެ މަރާ ގުޅިގެން ދެން ވާހަކަ ދެކެވެމުން ދަނީ އޭނާ މަރުވީ ކަރަންޓް ޖެހިގެން ކަމަށެވެ. އޭނާ އެތަނަށް ވައްކަން ކުރަން ވަދެ އުޅެނިކޮށް ކަރަންޓް ޖެހުނީ ކަމަށް އަޑު އެތުރިފައިވެއެވެ. އެއަށް ބާރު ލިބެނީ އެ ހަރުގެ ވައްކަން ކުރާތީ، ފުލުހުންނަށް އެކަމުގެ ރިޕޯޓް ހުށަހަޅައިފައި ވުމެވެ.

"ވައްކަން އެތަނުން ކުރޭ. އެކަން ދެތިން ފަހަރެއްގެ މަތިން ފުލުހުންނަށް ހުށަހެޅިން. އެތަނުން އިލެކްޓްރޯނިކް ސާމާނާއި އެހެނިގެން އެއްޗެހި ވަގަށް ނަގާ އުޅޭ. ކަރަންޓް ވައިރުތައް ވެސް ބުރިކޮށްގެން ވަގަށް ނަގާފައިވޭ. ކަރަންޓް ޖެހުމަކީ ކައިރި ކަމެއް،" ހަރުގެ ބަލަހައްޓާ ސައީދު ބުންޏެވެ.

ސިމާދުގެ މަރާ ގުޅިގެން، ފުލުހުން ތަފްސީލީ މައުލޫމާތުތަކެއް އަދި ހާމައެއް ނުކުރެއެވެ. އާއިލާ އިން ބުނީ ސިމާދު ގެއްލިގެން ހޮނިހިރު ދުވަހު ރޭ ދެ ފަހަރެއްގެ މަތިން ފުލުހުންނަށް ރިޕޯޓް ކުރި ކަމަށެވެ. ނަމަވެސް އޭނާ ގެއްލިގެން ހޯދަން ފުލުހުން ރަށުގައި އާންމުކޮށް އިއުލާންނުކޮށް، މިއަދު ހެނދުނު އޭނާގެ މަރުގެ ޚަބަރު ދިނުމާއެކުގެ އާއިލާއަށް ވަނީ ބޮޑު ސިހުމެއް ލިބިފައެވެ.