ކުރީގެ ރައީސް އަބްދުﷲ ޔާމީންގެ ވެރިކަމުގައި ނަގާފައިވާ ލޯނުތަކުން ރާއްޖެއަށް ދިމާވެފައިވާ "ޑެޓް-ޓްރެޕް" ނުވަތަ ދަރަނީގެ ދަންތުރައިން ސަލާމަތްވާނެ ގޮތްތަކާއި ބެހޭ ގޮތުން ކުރީގެ ރައީސް މުހައްމަދު ނަޝީދު އިންޑިއާގެ ހާރިޖީ ވަޒީރު ސުޝްމާ ސުވަރާޖް އާ އެކު މަޝްވަރާ ކުރައްވައިފިއެވެ.
ބުރާސްފަތި ދުވަހު ނިއު ދިއްލީގައި ނަޝީދާއި ސުޝްމާ ސުވަރާޖް ވަނީ ބައްދަލުކުރައްވާ ގިނަ މަޝްވަރާތަކެއް ކުރައްވާފައައެވެ. މިމަޝްވަރާތަކަށްފަހު ނަޝީދު ކުރެއްވި ޓުވީޓުގައި ވިދާޅުވީ ބޮޑު ހިތްހަމަ ޖެހުމެއް ލިބިއްޖެ ކަމަށާއި، ރާއްޖެއަށް ދިމާވެފައިވާ މައްސަލަތަކުގެ ތެރެއިން މައިގަނޑު ތިން ކަމަކާއި ބެހޭ ގޮތުން މަޝްވަރާ ކުރެވުނު ކަމަށެވެ.
އެއީ މޫސުމަށް އަންނަ ބަދަލުތަކުގެ ސަބަބުން ރާއްޖެއަށް އެކަމުން ކުރާނެ ނޭދެވޭ އަސަރުތަކާއި، ހަރުކަށި ވިސްނުމުގެ ކަންކަމާއި ބެހޭ ގޮތުން އަދި ރާއްޖެއަށް ދިމާވެފައިވާ ދަރަނީގެ ބޮޑު މައްސަލައެވެ.
Delighted to meet Indian External Affairs Minister @SushmaSwaraj in New Delhi today. Good discussion on 3 areas of mutual concern: climate change, extremism, and the danger of Maldives falling into a ‘debt trap’ because of the reckless borrowing of previous administration. pic.twitter.com/E7tWlRVt7N
— Mohamed Nasheed (@MohamedNasheed) February 14, 2019
ރައީސް ނަޝީދު އިންޑިއާއަށް ވަޑައިގެންނެވީ އިންޑިއަން ކައުންސިލް ފޯ ކަލްޗަރަލް ރިލޭޝަންސް އާއި ޖަވާހަރްލާލް ނެހްރޫ ޔުނިވަރސިޓީގެ ދައުވަތަކަށް މިދެ ޔުނިވާސިޓީއެއްގައި ތަގްރީރު ކުރެއްވުމަށެވެ.
ކުރީގެ ރައީސް ޔާމީންގެ ސަރުކާރުން ވަނީ ޗައިނާއިން ގިނަ ލޯނުތަކެއް ނަގައިގެން މަޝްރޫއުތައް ހިންގާފައެވެ. އެ ގޮތުން އެންމެ ފާހަގަކޮށްލެވޭ އެއް މަޝްރޫއަކީ މާލެ އާއި ހުޅުލެއާ ދެމެދު ގާއިމުކޮށްފައިވާ ބްރިޖެވެ. އެ މަޝްރޫއަށް 300 މިލިއަން ޑޮލަރު ހޭދަކޮށްފައިވާ އިރު ބޮޑު ބައެއް ހިއްސާކުރަނީ ބޮޑު އިންޓަރެސްޓާ އެކު ޗައިނާ އިން ދިން ލޯނެވެ.
ނަޝީދު ވިދާޅުވީ ރައީސް ސޯލިހްގެ ސަރުކާރުން މަސައްކަތް ކުރަނީ އެ މަޅިތަކުން ރާއްޖެ ސަލާމަތްކުރުމަށް ކަމަށެވެ.
