މާޒިޔާ ސްޕޯޓްސް އެންޑް ރެކްރިއޭޝަންގެ ކުރީގެ ކޯޗު އަލީ ސުޒެއިން ވިކްޓްރީ ސްޕޯޓްސް ކްލަބްގެ ކޯޗުކަމާ ހަވާލުވެއްޖެ އެވެ.
ބުދަ ދުވަހު ވިކްޓްރީން ބޭއްވި ނޫސްވެރިންގެ ބައްދަލުވުމުގައި އެއްބަސްވުމުގައި ސުޒެއިން ވަނީ ސޮއިކޮށްފައެވެ. އޭނާ އެ ކްލަބަށް ސޮއިކުރީ އެއް އަހަރު ދުވަހުގެ އެއްބަސްވުމެއްގެ ދަށުންނެވެ.
މިދިޔަ ސީޒަނުގައި މާޒިޔާ ގޮވައިގެން ނިކުތް ސުޒޭން ކޯޗުކަމުން އިސްތިއުފާ ދިނީ އެޓީމާއެކު އޭނާގެ ޓާގެޓް ހާސިލްނުވުމުންނެވެ. މިދިޔަ ސީޒަނުގައި މާޒިޔާ އަށް ކާމިޔާބުކުރެވިފައި ވަނީ ޗެރިޓީ ޝިލްޑް އަދި ދިވެހި ލީގު އެކަނިއެވެ. އެޓީމު ވަނީ ޕްރެޒިޑެންޓްސް ކަޕް އަދި އެފްއޭކަޕުން ކަޓައިފައެވެ.
ވިކްޓްރީގެ އާ ބޯޑަކާއެކު އާ ޗެއާމަނެއް ފެނިގެންދާއިރު، އެޓީމަށް ބޮޑެތި ބަދަލުތަކެއް ވަނީ ގެނެސްފައެވެ. އެގޮތުން ޓީމު ހިންގުން ހަރުދަނާކޮށް ގައުމީ ޓީމުގައި ކުރިން ހިމެނުނު އަދި މިހާރުވެސް ގައުމީ ޓީމަށް ކުޅޭ ކުޅުންތެރިން ވަނީ ގެނެސްފައެވެ.
ކުރިން ބާސްކެޓް އެސޯސިއޭޝަންގައިވެސް ހަރަކާތްތެރިވި އަހުމަދު ނަޒީމް ވިދާޅުވީ ކުރިޔަށް އޮތް ސީޒަނަށް އެޓީމު ނިކުންނައިރު، އަމާޒަކީ ތަށްޓެއް ކާމިޔާބުކުރުން ކަމަށާއި، މިހާރުގެ ސްކޮޑާއެކީ އެ ޓާގެޓް ހާސިލްވާނެ ކަމަށެވެ.
ކުރިޔަށް އޮތް ސީޒަނާ ދިމާކޮށް ވިކްޓްރީ އަށް ގެނައީ ހަސަން އަދުހަމް (ސަޑޭ) އިސްމާއީލް އީސާ (މެސީ) އަދި މުހައްމަދު އާރިފް (ބަކާ) ގެ އިތުރުން ނިޔާޒް (ނިޔާ) އެވެ. މީގެއިތުރުން އެޓީމަށް ގަލޮޅު ދަނޑުން ކުރިން ފެނުނު ދެ ބިދޭސީ ކުޅުންތެރިންވެސް ވަނީ ގެނެސްފައެވެ. އެއީ އީގަލްސް އަށް ކުޅުނު މުސްތަފާ ސާދިގް އާއި ޔޫވީއަށް ކުޅުނު މަހުމޫދު އަލްޔޫސުފާއި އަންދުރޭ އެވެ.
