ސިވިލް ސާރވިސް ކޮމިޝަން (ސީއެސްސީ)ގައި ހުސްވެފައިވާ މެންބަރު ކަމުގެ މަގާމަށް އިބްރާހީމް ޝަފީގް، ސޯސަންގެ، ބ. ގޮއިދޫ، އައްޔަން ކުރުމަށް ރައްޔިތުންގެ މަޖިލީހުން ފާސްކޮށްފި އެވެ.

ބުދަ ދުވަހު ބޭއްވި ރައްޔިތުންގެ ޖަލްސާގައި ސީއެސްސީގެ މެންބަރު ކަމަށް ޝަފީގު އައްޔަން ކުރުމަށް ފާސްކޮށްފައި ވަނީ 49 މެންބަރުންގެ އަޣްލަބިއްޔަތުންނެވެ. ނުފެންނަ ކަމަށް 23 މެންބަރަކު ވޯޓް ދެއްވިއިރު، ވަކިގޮތަކަށް ވޯޓް ދެއްވަން ބޭނުންނުވާ ތިން މެންބަރުން ތިއްބެވި އެވެ.

ސީއެސްސީގެ މެންބަރު ކަމަށް ޝަފީގު އައްޔަން ކުރުމަށް މަޖިލީހުން ފާސްކޮށްފައިވާއިރު، ރައީސުލްޖުމްހޫރިއްޔާ އަބްދުﷲ ޔާމީނަށާއި ކުރީގެ ރައީސް މައުމޫން އަބްދުލްގައްޔޫމަށް ބޭބޭފުޅު ވިދާޅުވާ ދައުލަތުގެ އިއްޒަތްތެރިއެއް ކަމަށްވާ އަބްދުﷲ ހަމީދުގެ ދަރިކަލުން ޝަމްއޫން ހަމީދު ވެސް އެމަގާމަށް ކުރިމަތިލައްވާފައި ވެއެވެ.

ސީއެސްސީއަށް މެންބަރަކު ހޯދުމަށް ރައްޔިތުންގެ މަޖިލީހުން ކުރި އިއުލާނާ ގުޅިގެން ކުރިމަތިލި ފަރާތްތަކުގެ ތެރެއިން، މިނިވަން މުއައްސަސާތަކާބެހޭ ކޮމެޓީން އިންޓަވިއުކޮށް މާކްސް ދީފައިވަނީ އަށް ފަރާތަކަށެވެ. އެ އަށް މީހުންގެ ތެރެއިން 83.6 މާކްސް ލިބިގެން ޝަފީގު އަށް އެ ކޮމެޓީން ރުހުން ދިނުމަށް ފާސްކޮށްފައިވާއިރު، އަނެއް ހަތް މީހުންނަށް ލިބިފައިވަނީ 75 މާކުހަށްވުރެ ދަށުންނެވެ. ދެ ވަނަ އަށް އެންމެ ގިނަ މާކްސް ލިބިލައްވާފައި ވަނީ ޝަމްއޫން ހަމީދަށެވެ. އޭނާއަށް 69.6 މާކްސް ލިބިފައި ވެއެވެ.

ކޮމެޓީގެ ރިޕޯޓަށް ވާހަކަ ދައްކަވަމުން އެ ކޮމެޓީގެ މެންބަރު، މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ (އިންތި) ވިދާޅުވީ ކޮމެޓީން މަސައްކަތްކޮށްފައިވަނީ އިންސާފުން ނޫން ކަމަށެވެ. އަދި ތައުލީމާއި ތަޖުރިބާގެ ގޮތުން ޝަފީގަށްވުރެ މާ ރަނގަޅު ބޭފުޅުން ކުރިމަތި ލައްވާފައިވާ ކަމަށް ވެސް އިންތި ވިދާޅުވި އެވެ.

ސިވިލް ސާރވިސް ކޮމިޝަނަކީ ފަސް މެންބަރުންގެ މައްޗަށް އެކުލެވޭ ކޮމިޝަނެކެވެ.