ދިވެހިރާއްޖޭގައި އުނގެނުމުގެ ހައްގު އެންމެ ފުރިހަމަ ގޮތުގައި ލިބިދިނުމަށް ގާނޫނީ އޮނިގަނޑު ގާއިމު ކުރުމަށްޓަކައި ސަރުކާރުގެ ފަރާތުން ހުށަހަޅާފައިވާ ތައުލީމުގެ ބިލް ރައްޔިތުންގެ މަޖިލީހުން ބަލައިގަނެ އެބިލް ދިރާސާ ކުރުމަށް ކޮމެޓީއަށް ފޮނުވައިފި އެވެ.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި އެބިލް މަޖިލީހަށް ބަލައިގަތުމަށް ފާސްކޮށްފައި ވަނީ 69 މެމްބަރުންގެ އަޣްލަބިއްޔަތުންނެވެ. ނުފެންނަ ކަމަށް އެއް މެމްބަރަކު ވޯޓް ދެއްވިއިރު، ވަކިގޮތަކަށް ވޯޓް ދެއްވަން ބޭނުންނުވާ އެއް މެމްބަރަކު އިންނެވި އެވެ.
އެބިލް ދިރާސާ ކުރުމަށް ފޮނުވާފައިވަނީ މަޖިލީހުގެ ގައުމީ ތަރައްގީގެ ކޮމެޓީ އަށެވެ.
ސަރުކާރުގެ ފަރާތުން، ފުނަދޫ ދާއިރާގެ މެންބަރު އަލީ ސަލީމް ހުށަހަޅުއްވާފައިވާ، ތައުލީމުގެ ބިލުގެ އިބްތިދާއީ ބަހުސް ރައްޔިތުންގެ މަޖިލީހުގެ ގަވާއިދުގެ 25 ވަނަ މާއްދާގެ (ނ)ގައިވާ ގޮތުގެމަތިން ކުރިއަށް ގެންދިއުމުގެ ފުރުސަތު ދިނުމަށްޓަކައި، މަޖިލީހުގައި ވޯޓު ނަގާ އަދި ބިލުގެ އިބްތިދާއީ ބަހުސް ކުރިއަށް ގެންދިއުމަށް މަޖިލީހުން ފާސްވެއްޖެނަމަ އެ ބިލުގެ އިބްތިދާއީ ބަހުސް ފެށުމަށް ބުދަ ދުވަހުގެ މަޖިލީހުގައި ވަނީ އެޖެންޑާކޮށް އިބްތިދާއީ ބަހުސް ކޮށްފަ އެވެ.
އެބިލްގެ ފުރަމަތަ ކިޔުން އިއްވާފައިވަނީ އަންގާރަ ދުވަހު އެވެ.
ތައުލީމުގެ ބިލްގައިވާ ގޮތުން މިއީ ގާނޫނުއަސާސީއަށާއި ކުޑަކުދިންގެ ހައްގުތަކާބެހޭ ބައިނަލްއަގްވާމީ މުއާހަދާއަށާއި، އިގްތިޞާދީ، އިޖުތިމާއީ އަދި ސަގާފީ ހައްގުތަކާބެހޭ ބައިނަލްއަގްވާމީ މުއާހަދާއަށް ރިއާޔަތްކޮށް، އުނގެނުމުގެ ހައްގުން ކުޑަކުދިންނަށާއި ބޮޑެތި މީހުންނަށް ރާއްޖޭގައި ކަށަވަރުކޮށްދޭ ނިޒާމެއް ކަމަށް ބުނެފައި ވެއެވެ.
އުނގެނުމުގެ ހައްގު ކުޑަކުދިންނަށް ކަށަވަރުކޮށްދިނުމުގައި ދައުލަތާއި މައިންބަފައިންނާއި ކިޔަވައިދޭ ފަރާތްތަކުގެ ޒިންމާތައް ވެސް އެބިލްގައި ކަނޑައަޅާފައި ވެއެވެ. އަދި މަތީ ތައުލީމު އުނގެނުމުގެ ފުރުސަތު ހަމަހަމަ ގޮތެއްގައި އެންމެހާ ރައްޔިތުންނަށް ކަށަވަރުކޮށްދިނުމަށްޓަކައި ހަމަހަމަ ފުރުސަތުތައް ފަހިކޮށްދެވޭނެ ނިޒާމެއް ކަނޑައެޅުން ކަމަށް ވެސް އެބިލްގެ މަގްޞަދުތަކުގެ ތެރޭގައި ވެއެވެ.
މީގެ އިތުރުން، ހަމަހަމަކަމާއި އިންސާފުވެރިކަމާއެކު ރާއްޖޭގައި ފެންވަރު ރަނގަޅު ތައުލީމާއި ތަމްރީނާއި ތަރުބިއްޔަތު ދެވޭނެ މާހައުލެއް ގާއިމު ކޮށްދިނުން ހިމެނޭއިރު، އިސްލާމީ އަގީދާ އާއި އިސްލާމީ ތަރުބިއްޔަތު އުނގަންނައިދޭ، އަދި އިންސާނީ ހައްގުތަކަށް އިހުތިރާމް ކުރުމަށާއި، އާއްމުކޮށް އެންމެންގެ މެދުގައި ސުލްހަމަސަލަސްކަމާއި ރަހުމަތްތެރިކަން ބާއްވައިގެން އުޅުމުގެ މުހިއްމުކަން އުނގަންނައިދޭ، އެކަންކަމަށް ބާރުއަޅާ ތައުލީމީ ނިޒާމެއް ގާއިމު ކުރުމާއި ގައުމީ ވާޖިބުތަކަށް އަހުލުވެރި، މުޖުތަމައުގައި ޒިންމާދާރު ދައުރެއް އަދާކުރެވޭނެ ގާބިލް ދަރިވަރުން އުފެއްދުމަށް މަގުފަހި ކުރުން ކަމަށްވެސް އެބިލްގެ މަގްސަދުތަކުގެ ތެރޭގައި ހިމެނެ އެވެ.
ތައުލީމުގެ ބިލްގައި 19 ބާބު ހިމެނޭއިރު، 57 މާއްދާ ވެއެވެ.
އެބިލަށް ބުހުސް ކުރެއްވި އެއްވެސް މެމްބަރަކު ރާއްޖޭގައި ތައުލީމުގެ ގާނޫނެއް އޮތުމަކަށް ދެކޮޅު ހައްދަވާފައެއް ނުވެއެވެ. ނަމަވެސް އެބިލް ފަރުމާކޮށްފައިވާ ގޮތުން އިދިކޮޅު ފަރާތްތަކުން ވަނީ ކަންބޮޑުވުން ފާޅުކޮށްފަ އެވެ. ސަބަބެއް ކަމަށް އެ މެމްބަރުން ވިދާޅުވީ ރާއްޖޭ ތައުލީމުގެ ނިޒާމު ސަރުކާރުގެ މުށުތެރެއަށް ލުމަށް ވުރެ، ޕްރޮފެޝަނަލް ފަރާތްތަކާ އެކު މަޝްވަރާކޮށް ރަނގަޅު ހަރުދަނާ އުސޫލްތަކެއް ކަނޑައެޅުން މުހިއްމު ކަމަށެވެ. އަދި ތައުލީމީ ދާއިރާގެ ކަންކަންކުރުމަށް ޕްރޮފެޝަނަލް މިނިވަން މުއައްސަސާއެއް އޮތުމުގެ މުހިއްމުކަން ބޮޑު ކަމަށް ވެސް ބައެއް މެމްބަރުން ވިދާޅުވި އެވެ.
