ޓައިގާ ޝޮރޯފްއަކީ ކުޑަ ދުވަސް ކޮޅެއްގެ ތެރޭގައި ގިނަ ބެލުންތެރިންގެ ހިތް އަތުލައިގެންފައިވާ ތަރިއެކެވެ.
''ބާޢީ 2" ފިލްމުން ބޮޑު ކާމިޔާބީއެއް ހޯދާފައިވާ ޓައިގާގެ ޑާންސް މޫވްތަކަކީ ރިތިކްއާ ވަރަށް އެއްގޮތް ހަރަކާތަކެއް ކަމަށް ގިނަ ބަޔަކު ބުނެއެވެ.
އަންނަ އަހަރުގެ މެއި މަހު ނެރެން ހަމަޖެހިފައިވާ ''ސްޓޫޑެންޓް އޮފް ދި އިޔާ 2'' ގެ ކާސްޓިން ތެރޭގައި ހިމެނޭ ޓައިގާ އިންޑިއާގެ ނޫހަކަށް ދިން އިންޓަވިއުއެއްގައި ބުނީ، އެކްޓަރަކަށް ނުވި ނަމަ ވާނީ ފުޓްބޯޅަ ކުޅުންތެރިޔަކަށް ކަމަށެވެ.
"ބާޢީ" ސީރީސްގެ '' ބާޢީ 3'' ގައި މަސައްކަތް ކުރަމުންދާ ޓައިގާ ބުނީ، ބޭނުން ވަނީ ފިލްމަކަށް ފަހު ފިލްމެއް ރަނގަޅު ކުރަން ކަމަށެވެ. "ބާޢީ" ގެ ގެ އިތުރުން ޓައިގާ ފިލްމީ ދާއިރާ އަށް ތައާރަފްވި ފިލްމު "ހީރޯ ޕަންތީ'' ވެސް ޑައިރެކްޓް ކޮށްފައިވާ ސާބިރް ޚާން އަށް ޓައިގާ ވަނީ ތައުރީފް ކޮށްފައެވެ.
ޓައިގާ އާއި ނަވާޒުއްދީން ސިއްދީގީ ކުޅެފައިވާ އެކްޝަން ޑާންސް ފިލްމު ''މުންނާ މައިކަލް'' ވެސް ޑައިރެކްޓް ކޮށްފައި ވަނީ ސާބިރް ޚާންއެވެ.
އުމުރުން 28 އަހަރުގެ ޓައިގާއަކީ ބޮލީވުޑްގެ މަޝްހޫރު އެކްޓަރު ޖެކީ ޝްރެފްގެ ދަރިފުޅެވެ. ޓައިގާގެ ބައްޕަ ޖެކީ ވަނީ މިހާތަނަށް 220 ފިލްމު ކުޅެފައެވެ.
