އެމްޑީޕީގެ ޗެއަރޕާސަން ކަމަށް ހޮވުނު ހަސަން ލަތީފުގެ މަސައްކަތުން ދިވެހިންނަށް ހައްގު މިންވަރު ހޯދާދެވޭނެ ކަމަށް ގަބޫލު ކުރައްވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ޗެއަރޕާސަން ކަމަށް ހޮވުނު ހަސަން ލަތީފަށް މަރުހަބާދަންނާ ކުރީގެ ރައީސް މުހައްމަދު ނަޝީދު ކުރެއްވި ޓްވީޓެއްގައި ވިދާޅުވީ، ހަސަން ލަތީފުގެ މަސައްކަތުން އެމްޑީޕީގެ ހިންގުން އިތުރަށް ހަރުދަނާވެ، އެމްޑީޕީ އިތުރަށް ވަރުގަދަވެގެންދާނެ ކަމަށެވެ.
Marhabaa Uz. @HassanLatheef! Manikfaanuge hinguntherikamaa eku MDP varugadhave Dhivehinah haggu minvaru hoadhai dheveyne.
— Mohamed Nasheed (@MohamedNasheed) February 10, 2017
ޗެއަރޕާސަން ކަމަށް ވޯޓުލުން ހުކުރު ދުވަހު ކުރިއަށްގެންގޮސްފައިވާ އިރު މިހާތަނަށް ވަގުތީ ނަތީޖާ އިއުލާނުކޮށްފައިވާ ފޮށިތަކުން ހަސަން ލަތީފަށް ފެންނަ ކަމަށް 23188 ވޯޓް ލިބިވަޑައިގެންފައިވެ އެވެ. އެ ވޯޓްފޮށިތަކަށް ޖުމުލަ 23404 މީހުން ވޯޓް ލާފައިވެ އެވެ. އޭގެ ތެރެއިން ޗެއާޕާސަން ކަމަށް ހަސަން ލަތީފް އިންތިިހާބު ކުރަން ނުފެންނަ ކަމަށް 160 މީހުން ވޯޓް ދީފައިވާ އިރު ބާތިލް 56 ވޯޓު ހިމެނެ އެވެ.
އެމްޑީޕީގެ އަސާސީ ގަވައިދު ބުނެފައި ވަނީ ޗެއާޕާސަންގެ މަގާމަށް ކުރިމަތިލާ މީހަކު އެމަގާމަށް ހޮވޭނީ އެންމެ މަދުވެގެން އެ ޕާޓީގެ މެމްބަރުންގެ ތެރެއިން 5،000 މެމްބަރުންގެ ތާއިދު ލިބުމުންނެވެ.
ޗެއާޕާސަންގެ މަގާމް ހުސްވީ ކުރިން އެމަގާމުގައި ހުންނެވި އަލީ ވަހީދު އިސްތިއުފާ ދެއްވުމުމުނެވެ.
